CEBU, Philippines - Karong adlawa maoy katapusang “hurrah†alang sa Chicago Bulls ug sa Oklahoma City Thunder.
Game-4 karong adlawa. Ang Bulls moharong sa Miami Heat ug ang Thunder makigbatok sa Memphis
Grizzlies. Ang Heat sa East ug Grizzlies sa West parehong nagtangag og 2-1 sa serye.
Ang nakapabor sa Bulls karon sa ilang tinguha nga motabla sa series, 2-2 maoy mo-host sa Game-4 ug wala na sila’y laing alas nga gihuptan ilabi na kay kuwang sila’g players. Diha unta kadto’y higayon nga duna pa sila’y key players sulod sa korte apan na-ejected silang Joakim Noah ug Taj Gibson sa Game-2 ug nasundan sab kini sa pagka-eject ni Nazr Mohammed sa Game-3.
Karon, dili na gyud angayan magpadala sa init ang Bulls ug kun magtinunto na sab sila’g duwa, kinsa na man sab kaha ang ma-thrown out? Alang kanako, mas maayo pa’g ang coach maoy ma-eject kay aduna pa’y assistant nga makapuli.
Hinuon, kun parte og pisikal nga duwa, mas champion ang Bulls kay dili gyud mahadlok morubo silang Noah, Gibson ug Carlos Boozer. Apan wala sab sa lagda sa basketbol nga kun ikaw maoy mas rubo, ikaw maoy mas labaw sa puntos.
Gihimadlan nang daan sa mga tigpaniid og NBA dinhi sa Sugbu nga dili gyud mosaler ang Bulls. Bisan gani sa seeding layo ra kaayo sila kay ang Heat maoy No. 1, samtang ang Bulls No. 5 lang.
Tuod man, unsa man sa’y ilang ikasustenir nga wala man silang Derrick Rose, Luol Deng, Richard Hamilton ug Kirk Hinrich.
Samtang didto sa Memphis, mas tungason ang tahas karon sa Thunder tungod kay tua sila magduwa sa korte sa Grizzlies atubangan sa gitawag og "hostile crowd." Palaran ang Thunder kun modaog karon kay buot pasabot niini, duna gyu’y Game-6 ug gani wala pay seguro nga molanat kini’g Game-7. Sa higayon nga makatabla ang Thunder sa 2-2, adto duwaon ang Game-5 sa Oklahoma City.
Alang kanako, daku ako’g pagsalig sa No. 1 team sa West batok sa No. 5 nga Grizzlies.
Sa akong obserbasyon, makahimo lang gihapon pagdaog ang Thunder bisan og wala si Russell Westbrook basta naa lang si Kevin Durant. Ang kuyaw nga wala si Durant. Masaligan man gihapon ang rookie guard nga si Reggie Jackson ug ang beteranong guard nga si Derek Fisher. (BANAT PALARO)