CEBU, Philippines - Daling misung ngadto sa usa ka police station didto sa General Santos City si Filipino boxing icon ug Sarangani Province Rep. Manny Pacquiao human siyam sa iyang mga taga-suporta ang naangol sa nahitabong kagubot nga may kalambigitan sa eleksyon.
Sa taho sa GMA News, si Pacquiao uban ang iyang abogado daling miadto sa usa ka police station dihang gipangbato ug gipamusil sa usa ka Barangay Captain sa maong lugar ang iyang mga taga-suporta.
Usa ka Brgy. Captain Alfredo Belgica nga usa ka suporter sa Achievers to Integrity Movement (AIM) ang gireklamo nga maoy namusil sa mga taga-suporta ni Pacquiao. Ang AIM maoy kontra nga partido sa People’s Champ Movement (PCM) ni Pacquiao..
Desidido usab si Pacquiao nga mopasaka og kaso sa maong kapitan ug gitigom na sa iyang kampo ang mga ebidensya aron masilotan ang suspetsado. (BANAT NEWS)