Siso misakmit sa una niyang 21-under title sa Gullas Tennis Cup

 CEBU, Philippines - Ang Sugbuanang tennis princess nga si  Sally Mae Siso ug si Nathalie Cobarde mipilde batok sa managlahi

nilang kaatbang aron manghawod sa ilang tagsa-tagsa ka dibisyon sa 18th Gullas Tennis Cup kagahapon didto sa Cebu

International Tennis Centre Inc. (CITCI) courts sa Laray, Consolacion.

 Si Siso, usa sa mga regular sa labing karaan nga developmental tennis tournament dinhi sa Sugbu, misakmit sa

iyang labing unang korona sa 21-under nga walay bisan usa lang ka lusok sa singot nga mitulo dihang ang iyang kontra sa

final nga si Kezia Jabines wala mopatim-aw sa ilang gitakda nga duwa.

 Sa pikas bahin, si Cobarde nagkadusingot sa wala pa madispatsar si Cristela Sampan, 7-6, 6-4 aron sakmiton

ang girls 12-under title.

 Karong adlawa gikatakda ang uban pang mga duwa sa kampiyonato diin si Jana Pages tinguhang mosakmit og

duha ka korona sa girls 18 ug 16 categories.

 Nakasud si Pages sa girls 18 finals human niya giugbok si Clare Lazaga, 6-1, 6-1. Iyang harungon sa finals si

Elgy Dasian.

 Sa girls 16, si Pages miabante sab sa final round dihang iyang gitagak si Cherry Mae Toledo. Iyang sangkaon si

Zethley Mae Alferez, kinsa mipalagpot ni Shyne Villareal.

 Sama ni Pages, si Alferez kaduha sab moduwa sa finals. Ang usa sa girls 17-under batok ni  Villareal. Gitaktak

ni Alferez si Kristin Renee Salimbangon, samtang si Villareal milampurnas ni Beverly Enriquez.

 Ang igsuon ni Kristin Renee nga si Cesar Kristofer Salimbangon ug Marc Norman Enriquez nakakuha sab og

duha ka lingkoranan sa finals.

 Si Salimbangon nakaangkon og lingkoranan sa unisex 10-under ug boys 12, samtang si Enriquez sa boys 18 ug

21-under.

 Nakasud si Enriquez sa 21-under boys finals pinaagi sa pagpilde ni Amiel Ayaay, 7-6, 6-4 ug sa boys 18

human niya gimasaker si Ralph Juliane, 6-0, 6-2.

 Si Enriquez makigbatok ni Jeffrie Jumawan sa 21-under final ug batok ni Joshua Kinaadman o di ba ni Jarryd

Laurel sa boys 18.  Si Jumawan misulod sa final human sa iyang 6-3, 7-5 nga kadaugan batok ni Jessie Daniel Villarin.

 Sa laing  bahin, si Christopher  Encarnacion moduwa sab sa final batok ni Joshua Kinaadman sa boys 16-

under.

 Si Encarnacion midaog batok   ni Elijah Arevalo, 7-6, 6-4, samtang si Kinaadman mipukan ni Andrei

Rodriguez, 6-3, 6-0 sa semifinal round.

 Sila si Francis Lambayan ug Clyde Dujali maoy mikompleto sa final diin sila magharong sa usa'g-usa sa 14-

under category. (BANAT NEWS)