CEBU, Philippines - Mga langyaw nga sila si Abraham Missos sa Kenya ug Lesley Patterson sa America maoy nanghawod sa tagsa-tagsa nila ka dibisyon sa Xterra Philippines Trail Run niadtong Domingo didto sa lungsod sa Liloan, Cebu.
Si Missos nga suki na sa mga weekend fun run sa Sugbu mipamatuod nga aduna usab siya'y ikabuga sa trail run human niya gidominar ang 21k men’s division sa Xterra Trail sa oras nga 1:38:10.
Nagsunod ni Missos ang Sugbuanong si Philip Duenas sa oras nga 1:38:12, samtang si Bonifacio Monjas maoy ikatulo sa oras nga 1:38:32.
Sa iyang bahin, si Patterson maoy milangkat sa korona sa women’s class sa oras nga 2:02:39 batok ni Aileen Breen (2:20:38) ug veteran Cebuana runner nga si Merlita Arias Dunkin (2:27:35) nga maoy mipahiluna sa ikaduha ug ikatulo nga dapit.
Sa 10k men’s run, si Michael Largo maoy unang milabang sa finish line sa oras nga 39:21, gisundan ni Ronie Andrin (41:28) ug Adonis Singson (42:07).
Ang top three finishers sa 10k women’s mao sila si Carina Wasle (49:07) sa Australia, Marichu Luterte (1:01:31) ug Jackielyn Calong (1:02:42).
Nanghawod sa 5K run mao sila si John Cliff Debulosan (22:47) ug Path Torromorro (31:16). (BANAT PALARO)