CEBU, Philippines - Ang Petron Blaze Booters, Alaska Aces ug Brgy. Ginebra Kings moparada sa ilang dekalibreng imports sa ilang pagpanulong sa multi-titled M. Lhuillier Kwarta Padala-Cebu Niños sa 2013 Sinulog Cup diha sa Cebu Coliseum.
Ang tulo ka adlaw nga torneyo sugdan karong Huwebes, Enero 31.
Gikuha sa Petron ang serbisyo ni 6-foot-8 Puerto Rican Renaldo Balkman, samtang ang Alaska bidahan ni 6- foot-9 Robert Dozier ug ang Ginebra mikuha ni Herbert Hill.
Si Balkman, usa ka NBA veteran ug usa sa mga sinaligang bench players sa New York Knicks ug sa Denver Nuggets.
Sa iyang bahin, atngan usab ang pagduwa ni Dozier uban sa Alaska tungod kay usa siya ka kanhi US NCAA standout diin niduwa kini sa Memphis University uban ni Derrick Rose.
Sama ni Balkman, si Hill miduwa usab kaniadto sa NBA uban sa Utah Jazz ug Philadelphia Sixers.
Ang upat ka koponan magsangka sa tulo ka adlaw nga torneyo diin ang team nga nakabaton og labing nindot nga rekord maoy kampiyon.
Ang mga tiket nagkantidad og P50 sa general admission, P150 sa upper box, P250 sa lower box, P350 sa reserved seats ug P500 sa ringside.