CEBU, Philippines - Ang two-division world champion nga si Donnie 'Ahas' Nietes (31-1, 17KOs) mosuway paghawan sa laing babag sa karera niya dihang manalipod kini sa iyang WBO light flyweight title batok ni Mexican WBO minimumweight titlest Moises Fuentes (16-1, 8KOs) sa main event sa Pinoy Pride XVIII nga uloha'g "World Champion vs. World Champion" sa Marso 2 diha sa Waterfront Cebu City Hotel and Casino.
"We had a tough negotiation between Zanfer Promotion, the biggest boxing promotion in Mexico and I am glad that we got the chance to stage Donnie’s fight here," matud pa ni ALA Promotions President Michael Aldeguer sa press conference kagahapon didto sa Sarossa International Hotel and Residential Suites.
Ang maong sangka labing una sa kasaysayan kay ang usa ka langyaw'ng world champion maoy manulong dinhi sa Pilipinas aron mohagit sa defending Filipino world champion.
Si Fuentes, ang reigning WBO 105-pound king, misaka sa 108-pound division aron hagiton ang ALA Boxing Gym star nga si Nietes. Nabantog sab siya sa kalibotan sa boksing human niya gipaundang ang Puerto Rican legend nga si Ivan Calderon pinaagi sa fifth round TKO niadtong Oktubre didto sa Puerto Rico.
Si Nietes sa iyang bahin, masaligon nga mapanalipdan niya ang iyang bakus sa iyang away batok ni Fuentes.
Wala pa maplansa ang kinatibuk-ang fight card, apan si super bantamweight prospect Genesis 'Azukal' Servania segurado na nga moaway sa supporting main event.
Ang maong away magsilbe nga tune-up fight alang ni Servania, kinsa giplanohang iparang batok ni kanhi Mexican champion Fernando Montiel sa Hunyo didto sa SM Mall-of-Asia Arena. (BANAT SPORTS)