5 ka Sugbuanong siklesta moapil sa Ronda Pilipinas
CEBU, Philippines - Lima ka elite Cebuano cyclists ang nagdala karon og misyon nga mohatag pagbalik og national title sa Sugbu sa 2013 LBC Ronda Pilipinas nga mosikad karong adlawa didto sa Zamboanga City.
Gipangulohan ni multi-titled John Renee Mier, ang mga Cebuano cyclists molumba sa 16-stage race nga molungtad sa 21 ka adlaw. Ilang taakon ang rota nga may gilay-on nga 2,200km.
Uban ni Mier mao sila si Elmer Navarro, Marvin Tapic ug managsuong Pagnanawon nga sila si Jaybop ug Jhunvie.
Sila si Mier ug Navarro molumba ubos sa Team PLDT/Spyder, samtang sila si Tapic ug managsuong Pagnanawon maoy modala sa bandera sa Y101 FM-Cebu.
Ang 20-anyos ug Sportswriters Association of Cebu (SAC) awardee nga si Mier mosalmot karon sa ikatulo niyang Ronda Pilipinas race ug determinado siya nga makuha niya ang overall title karong tuiga.
"Halos mi under-23 sa team pero mga experienced na sad so fight gyud ni," matud pa ni Mier, ranked No. 9 sa miaging tuig.
Human sa stage 1 karong adlawa didto sa Zamboanga, ang mga riders mobalhin didto sa Pagadian City ngadto sa Iligan sa dili pa sila molumba dinhi sa Sugbu.
Gikan sa Mindanao ug Visayas, ang mga cyclists adto na sab magginukdanay sa Luzon diin didto ilang masugatan ang lain pang makutas nga race legs. Matapos ang lumba didto sa Baguio sa Pebrero 1.
Moabot ngadto sa P7.5 million ang ganting salapi nga giandam alang sa top performers sa maong lumba.
Ang kampiyon mobulsa og P1 million, ang second placer makadawat og P500,000, samtang ang third placer makaangkon og P250,000.
Ang fourth ug fifth placers makadawat og 100,000 ug P80,000 matag usa.
Sa laing bahin, si Lapu-Lapu City Mayor Paz Radaza ug ubang mga Oponganons naghinam-hinam na sa ilang pag-host sa Stage 5 (156.8km) karong Enero 18 nga manukad sa Mactan Island paingon ngadto sa Busay agi sa Sogod,
Tabuelan ug Balamban.
Ang Stage 4 nga may gilay-on nga 134.2km gitakda sa Enero 17 nga anha magsugod ug tapuson sa Plaza Independencia.
"With the support of the private sector, our dream of becoming a favored sports tourism destination is starting to come true," matud ni Mayor Radaza atol sa press conference kagahapon didto sa Be Hotel. (BANAT SPORTS)
- Latest
