CEBU, Philippines - Ang Sugbuanong boksidor nga si Rocky 'Road Warrior' Fuentes sa ALA Boxing Gym manalipod karon sa
iyang Oriental and Pacific Boxing Federation (OPBF) flyweight title batok sa Hapon nga si Yuki Nasu didto sa Korakuen
Hall sa Tokyo, Japan.
Ang garbo sa Brgy. Mambaling nga si Fuentes mohimo sa ikaduha niyang title defense karong tuiga human usab
siya midaog sa miagi niyang sangka batok sa South Korean nga si Myung Ho Lee niadtong Septiyembre 22 didto sa
Waterfront Cebu City Hotel and Casino.
Hinuon, dili kakompiyansaan si Nasu tungod kay nabantog kini nga usa ka lig-on ug beteranong Japanese
fighter.
Sa katapusan niyang sangka, si Nasu mi-TKO sa third round sa Thai fighter nga si Witcharapol Kaitprapat.
Si Fuentes nagbitbit og rekord nga 34-6, 20KOs, samtang si Nasu adunay 23-6, 16KOs. (BANAT NEWS)