CEBU, Philippines - Ang giilang road racer king sa Sugbu nga si John Rene Mier mopakita na usab sa iyang abilidad sa Cebu Challenge-Mountainbike nga mosikad karong adlawa.
Manukad kini sa Talisay City paingon sa Tuburan ug balik sa gigikanan.
Si Cebu First District Representative Eduardo R. Gullas maoy mopabuto sa starting gun, samtang si Tuburan Mayor Democrito Diamante maoy motunol sa award ngadto sa top performers sa stage 1.
Gipaabot usab ang pagsalmot ni Niño Surban, ang labing kinakusgan nga mountainbiker sa nasud.
Hinuon, giklaro ni race director Joe Deresas nga wala pa mopadayag sa iyang partisipasyon si Surban, apan kun moapil kini, mas nindot nga kompetisyon ang makita karon.
Gawas ni Mier, sila si Marvin Tapic, Jaybop Pagnanawon ug uban pang mountainbikers ang mopakita og aksiyon ning maong kalihukan nga gipasiugdahan ni Cebu Sports Hall of Famer David 'Kuya Boy' Odilao Jr.
Ang lumba dili lamang sa mga elite riders, apan lakip usab sa junior, senior, executive, fat boys ug women's open.
Kapin sa 100 ka pedal-pushers ang gilauman mopakita sa ilang abilidad ning usa ka adlaw nga lumba diin ang mga riders mosikad og 170 kilometros nga buakon sa duha ka hugna.
Gawas sa stage winners, ang riders mahimo sab nga modaog sa King of the Mountain ug Sprint King awards.
Mokabat sa P115,000 nga ganting salapi ang gigahin alang sa mga mananaog.
Ang rider kinsa modominar sa duha ka hugna makadawat og ganting salapi ug ingon man Presidential Cup kortesiya sa Cebu Unified Eagles Club pinaagi sa ilang president nga si Dr. Bert Alvarado. (BANAT NEWS)