Hingpit ng gioktaba ni Presidente Ferdinand Marcos Jr. ang barangay ug Sangguniang Kabataan elections (BSKE).
Nalipay gyud ang mga nakauyon sa mga naglingkod nga opisyales, apan namalikas katong wala ganahi nila.
Imbes usa nalang unta ka tuig ang ilang nahibiling termino karon, nalugwayan na og dugang duha ka tuig.
Kining bag-ong gipirmahang balaod sa presidente nga Republic Act 12326 gihimo ng lima ka tuig ang termino sa barangay officials kay sa pagkakaron, upat ka tuig ra ilang termino ug karun untang bulan sa Nobiyembre ang eleksyon ug gisibog kini karung Nobiyembre sa sunod tuig.
Ang RA 12326 gi publikar dayun sa Official Gazette isip “immediately executory,” matud pa ni Commission on Elections Chairman George Garcia.
Ang dakong kwestyon ana, kanang padayung paglingkod sa mga incumbent BSK officials nga way ayo, tapulan ug dawat lang og limpyo.
Sama sa gipaabot, daghang nisupak ani ug naay mohagit ani ngadton sa Korte Suprema. Para nila, nalapas sa maong balaod ang katungod sa mga tawo nga mobotar.
Dili man tingali kwestyon ang katungod nga mobotar, kay gisibog ra ang petsa.
Pinaagi unta sa eleksyon, matangtang ang mga naglingkod nga walay gamit, ug labaw sa tanan, mga abusado ug kurakot.
Karun, magpadayun ang pag-antos sa mga barangay sa mga way ayo nilang opisyales.
Ang ingon ni Marcos “not extra time in office, but extra time for accountability to the people,” ang paglugway sa termino , pero giawhag niya ang BSK officials nga magtarung sa ilang serbisyo.
Kaning lugway paagi sad daw ni para dili maputol ang mga nasugdang mga programa.
Maayo lang na kung tarung nga mga opisyal, unsaon nalang sa katong mga way gamit, abusado ug tapulan?