Angay na bang kuyawan si Bise Presidente Sara Duterte? Sa hukom sa mayoriya sa senator judges pagpaubos sa gidaghanon sa mga boto nga gikinahanglan pagkonbikto niya? Nga dili na i-base sa 24 ka mga sakop sa Senado kon dili sa mga sakop nga aktuwal nga naka-apil sa impeachment trial?
Bisan sa pasalig sa mga eksperto sa balaod nga maka-benepisyo sa bag-ong lagda, kay naibanan sab ang mga boto nga maka-absuwelto niya, nahimo bang mas sayon para sa administrasyon ang pagpalagpot niya sa puwesto ug pag-ban niya sa eleksiyon sa 2028?
* * *
Kon ang botasyon niadtong Miyerkules mao nay timaan sa kataposang hukom sa senator judges inig human sa husay, segurado siyang makonbikto. Bisan sa pasalig ni Senador Alan Peter Cayetano nga ang pagbotar ni Senador Mark Villar uban sa mayoriya wala magpasabot nga nihiyos ang minority bloc.
Mo-ubos ngadto sa 13 ang mga boto nga gikinahanglan pagkonbikto kon si Cayetano dili sab makatiwas sa husay. Kay maapsan sa mga kasong plunder sa gipasangil nga mga anomaliya sa flood control projects sa Taguig ug sa hosting sa 2019 Southeast Asian Games.
* * *
Mga nalista sa ibabaw mahimong makapatay-og sa mga nahibilin sa minoriya. Wala nay kapuslanan ang ilang kawsa pagdupa sa sinumbong uban ang paglaom nga premyohan sila kon makapuli na si VP Sara sa Malakanyang. Kay gawas nga dili nang kadagan si VP Sara peligrong maputos sa mga kasong dili kapiyansahan.
Panahon na bang mopaundayon sa administrasyon? O mangita og laing grupo nga mas makatabang sa ilang pagdagan sa reelection o sa mas taas nga puwesto?
* * *
Dili lang mga alyado ni VP Sara sa Senado ang gikuyawan. Hasta ang ubang mga politiko ug mga negosyante nga niduyog sa iyang parada (apil nang China, kon tinuod nga nibubo na og kuwarta para niya) mahimong maghunahuna na og makadaghan angay bang mobalhin sa ilang pusta.
Sa pikas nga bahin, ang kampo ni VP Sara mahimong nagtuon sab sa dinaliang panginahanglan sa pagpangita og alternatibo. Kinsa man ang mas dumadaog: Si Baste Duterte, si Robin Padilla, o si Pulong Duterte? Gipangandaman na ba sab kini sa Malakanyang? Mao nga hastang mga alternatibo duna nay posibleng mga kaso?
***