Karong hapon, Hulyo 27, 2026, maoy ika-limang State of the Nation Address (SONA) ni Presidente Bongbong Marcos ug ika-41 nga SONA sukad sa EDSA People Power diin gipalagpot sa katawhan ang amahan sa kasamtangang presidente tungod sa lapad nga pasangil sa pangurakot ug abuso sa gahom.
Gikan ni kanhi presidente Cory Aquino hangtod karon way nausab sa mga pulong nga gilitok sa mga nanlabay nga mga presidente sa nasud.
Pulos mga bulatik ug ulog-ulog ang madungog sa publiko mataghigayon nga mohimo sa iyang SONA ang usa ka presidente--- silang tanan way mapili!
Ang labing dakong bulatik ug ulog-ulog nga atong nadunggan ug posibling padayon pang madunggan karong hapon ug sa mga umaabot pa nga mga SONA mao ang kunohay tinuod nga kampanya pagbadlong sa mga kurakot nga mga opisyal ug ang mga tam-is nga pasalig nga manubag ang mga kawatan sa gobyerno.
Lab-as pa ang pangugat ni Presidente BBM atol sa iyang ika-upat nga SONA niadtong miaging tuig dihang iyang giawhag ang iyang mga kaubang opisyal nga nalambigit sa mga anomaliya sa flood control project nga magbaton og kauwaw ug mohunong na sa ilang tinonto dungan ang pasalig nga iyang gukdon ang mga nalambigit.
“Mahiya naman kayo,” maoy tukmang pulong nga iyang gilitok atol sa maong higayon.
Apan hangtod karon wala makita sa publiko nga seryoso ang presidente sa iyang saad nga patubagon ang mga nalambigit sa anomaliya sa flood control.
Samtang duna nay mga tawo nga nag-atubang og imbestigasyon ug napasakaan og kaso, apan dayag ang ka haw-ang ug ka kuwangan sa kampanya sa gobyerno paglutos sa tanang mga nalambigit.
Bisan unsaon og kumbinsir sa administrasyon ang publiko dili matago ang tataw nga mga timailhan nga gipili lang ang mga tawo nga giimbistigar ug gipasakaan og kaso.
Ang nakaparat kay sa mata sa publiko daw sa gihimong hinagiban sa administrasyon ang anomaliya sa flood control aron gukdon ang iyang mga kritiko ug mga kontra sa politika.
Angkunon man o dili sa administrasyon apan mao ni mensahi nga miabot sa yanong Pilipino.
Ug tingali mao ni hinungdan nganong bisan sa ka seryoso sa mga pasangil sa anomaliya batok ni Bise Presidente Sara Duterte nagpabilin gihapon nga taas ang pagsalig sa katawhan niya.