Mag-unay na ba?
Ambot tungod ba kaha sa kalagot sa pagbabag sa Ombudsman sa iyang biyahe sa Singapore ug sa hulga nga i-freeze ang iyang bank accounts ug ubang kabtangan, nakalimtan ni kanhi House Speaker Martin Romualdez ang iyang naandan nga panagang sa mga pasangil sa pagpangawkaw: Nga limpiyo ang iyang konsiyensiya ug wala siyay nahimong kalapasan.
Sa video message nga iyang gipadala sa House of Representatives niadtong Martes, si Romualdez igo na lang niingon nga dili mosugot nga tungod sa maniobra sa politika siya maoy patubagon sa kawat sa ubang mga tawo.
* * *
Kon wala pa unta mabisto ang kinawatay sa P1.7 trilyones nga flood control scandal mahimong maminaw ang magbubuhis sa depensa ni Romualdez: Nga dili siya ang mastermind kay igo lang nituki sa budget sa Malakanyang ug walay labot sa pagpatuman sa mga proyekto.
Pero mga imbestigasyon sa eskandalo nibutyag nga apil ang mga kongresista, mga senador ug Malakanyang sa konsabo paglista sa mga proyekto (nga ibaligya nang daan sa mga kontraktor), pagmaniobra sa subasta, paggamit og substandard materials o pag-imbento sa mga proyekto, ug pagpaningil sa mga komisyon.
* * *
Aron mahingpit ang iyang panghunaw, gipasanginlan ni Romualdez nga utok sa pagbinuang sa 2025 budget, nga gihulagway nga labing kurakot sa kasaysayan, silang kanhi Senate President Chiz Escudero ug kanhi House Appropriations Committee Chair Zaldy Co.
Pero siyay nagtudlo ni Co ug napatuman ang mga palusot nilang Co ug Escudero kay nipirma siya sa budget. Lisod sang tuohan nga samtang nag-piyesta og kinawatay ang mga kongresista, si Romualdez nilingiw nga wala mobadlong, wala gani mangayo og bahin.
* * *
Gitulisok sab ni Romualdez si Presidente Ferdinand Marcos Jr. Nga maoy responsable sa pagpatuman sa mga proyekto, apil nang pagbayad sa ghost projects. Gipasidan-an sab nga daghan siya og nahibaw-an sa administrasyong Marcos ug nangaging mga pamunoan.
Sa dili pa ta makumbinser nga nag-unay nang manag-agaw, nga tinuod nang magpabuhagay sa ilang mga baho, palihug atong hinumdoman. Siyam ka buwan na human sa State of the Nation Address ni Marcos nga nisukmat sa Kongreso nga angayng mauwaw sa labing dakong kawat sa atong kasaysayan, wala pay bisan usa sa incumbent nga mga sakop ang napriso.
* * *
- Latest
