Kwarenta

Pebrero 22, 2026: Unang Domingo sa Kwaresma

Mga Pagbasa:  Gen. 2;7-9; 3;1-7/

Sal. 51/Rom. 5;12-19/Mt. 4; 1-11

Maayong Balita

Sa wala pa si Jesus mohasonghasong sa iyang misyon, nangandam una siya. Iyang gihimo ang seklusyon. Sa maong seklusyon wala siya mokaon ug sulod sa kwarenta kun kap-atan ka adlaw ug gabii siya nag-ampo. Sa maong panahon nakasinati si Jesus ug pagsulay. ang nisulay kaniya mao gyud ang yawa nga nitintal kaniya sa tanang paagi.

Ang tumong niini mao man ang pagpahilayo ni Jesus sa iyang sense of purpose ingon nga espirituhanong pangulo ug mesiyas. Sa kaulahian mas gipili ni Jesus ang pagsunod sa kabubut-on sa Amahan sa iyang pag-ingon: “Pahawa Satanas, ang kasulatan nag-ingon Ayaw tintala ang Ginoo nga imong Dios ug siya lamang ang Alagari!”

Kasinatian

Ang pulong kwarenta kun kap-atan maoy sukaranan sa Espanyol nga pulong kwaresma. Ang numero 40 diha sa balaang kasulatan nagpasabot man og purification kun paglimpiyo. Sulod sa kap-atan ka mga katuigan nipanaw ang katawhan sa Israel padulong sa yutang gisaad.

Gihinloan ang kalibutan sa mga dautan sa panahon ni Noe sa dihang niulan sulod sa kap-atan ka adlaw ug gabii nga niresulta sa dakong lunop. Si Jesus sa atong ebanghelyo nangandam sulod sa 40 ka adlaw sa wala pa niya sugdi ang iyang misyon. Ug bisan gani kitang mga tawo kun mamatyan man gani ang magsubo sulod usab sa kwarenta ka adlaw. Mao nay kahulogan kun nganong dunay 40 diaz.

Lihok

Sa atong pagsugod ning panahon sa kwaresma atong pamalandongan kining mosunod:

1. Kun si Jesus gigutom ug gitintal aron himoong pan ang mga bato, nahimo ba akong mas magpakabusog sa mga kalibutanong katagbawan kaysa akong espirituhanong kahimsog?

2. Kun si Jesus gitanyagan og mga bahandi ingon man gingharian, nahimo ba akong agap bisan sa diyotay nga bahandi nga tungod niini nadaut ang akong relasyon sa uban?

3. Kun si Jesus gihagit aron paambakon sa kinatumyang bahin sa templo aron siya masikat, nahimo ba akong uhaw sa pasidungog sa uban nga tungod niini mahimong akong dauton ang uban aron ako ang mogawas nga maayo?

Pangamuyo

Dios Namo sa Kalooy ikaw ang among Amahan

Magbubuhat, manunubos O Ginoo sa ngatanan

Jesus Malooy ka kanamo! Pasayloon mo kami!

Ang sala gidumtan namo! Dili na mag-usab kami!

Namatay si Jesukristo, didto sa Kalbaryo

Aron nga kita maluwas! Sa kasubo nga dako