Gipahibalo sa usa ka balita sa The Philippine Star nga nagbunga ang kahago sa pagpatuman og kausaban sa curriculum sa mga tinun-an sa elementarya hangtud sa junior high school dinhi sa nasud.
Kini mao ang gitawag nga Matatag curriculum ngadto sa 70 ka mga pilot schools gikan sa pito ka mga rehiyon. Matud pa nga sa unang tuig palang nga kini gipatuman, 2023-2024 nilambo ang lebel sa kahibalo sa mga bata sa pagbasa, matematika, science ug values education.
Maayo ni nga balita kay kung mahinumdoman sa gihimong PISA assessments (Programme for International Student Assessment) sa OECD (Organisation for Economic Co-operation and Development) niadtong tuig 2022, hapit tua sa kinaubsan ang mga estudyante sa Pilipinas sa lebel sa nakat-unan kun itandi sa mga estudyante sa ubang mga nasud. Nakita kaniadto ang grabeng pagkubos sa lebel sa kamahoan sa mga tinun-an ilabi na sa elementarya. Partikular ani ang mga subject sa matematika, science ug sa pagbasa. Daghan ang dili makamaong mobasa ug ang uban makabasa man tuod apan wala kasabot kun unsa ilang gibasa.
Ang pagkubos sa kalidad sa edukasyon gipasangil sa kakulangon sa gobiyerno paghatag og pagtagad sa mga gikinahanglan para sa edukasyon.
Kini sama sa kakulangon sa mga de kalidad nga magtutudlo, ang curriculum , problema sa kakulang sa mga lawak-saringan, mga libro ug ingon man ang mga katalagman. Pun-an pa sa kapin duha ka tuig nga pandemiya sa COVID-19 ug daghan ang mga kabus.
Ang gidaghanon sa mga subjects nga kinahanglang tun-an kada adlaw nakapalisud sa mga bata nga makat-onan ang tanan.
Apan subo lang nga samtang tuod nangusog ang mga magtutudlo nga mapatuman ang maong curriculum aning 70 ka mga pilot schools, sila maoy naapektahan.
Kini tungod kay sila maoy mipreparar nigasto sa mga materyales nga kinahanglan sa pagtudlo gumikan kay kuwang og mga libro, unya daghang sayop ang mga librong gipagamit ug gihagoan nila kini pagkorihir.
Sa ato pa, andam ang mga magtutudlo para matabangan ang mga bata, ang kakulangon naa mismo sa departamento.