Diha sa bisan unsang liderato

Kun tinguha mo nga lipayon ang tanang mga tawo ayaw na lang pangambisyon nga mamahimo kang lider hinunoa, mas maayo nga mamaligya na lang ikaw og ice cream.

Mao kini ang akong gitambag sa akong higala nga nibati og tumang kasagmuyo sa gibuhat sa iyang mga ginsakpan ngadto kaniya sanglit nataligam-an man ang pagpasalamat ug natandog dako uyamot ang ilang garbo sa maong hitabo.

Hinuon dili ako makabasol kay kining pagpasalamat bisan unsa ka gamay nga akto sa kaayo ang makapatukbil man sa dugang kaikag nga manlimbasog aron dunay matampo.

Ang pagpasalamat usa man ka pag ila sa paningkamot nga gihimo. Normal kining bation apan dili sa tanang panahon.

Daghang mga higayon nga mataligam-an ang lumilihok kay mismo ang nangulo ang daghan man usab og gihunahuna.

Sa atong pagkatawhanon daghan kaayo kita og mahikalimtan. Unta ang mga hingtungdan nga katawhan unta, ang maantigo nga mosabot sanglit ang atong gipasalamantan walay lain kondili ang Ginoo ug wala nay lain pa.

Sa laing bahin, nindot ang consultation apan usahay ang maong proseso kon dili ma handle pag-ayo magpadugay og samot sa resulta. Dunay mga higayon nga ang usa ka lider ma misinterpret ug gani usahay I reject.

Apan bisan pa man sa maong rejection, angayan lamang nga kita mamahimong fixed sa paggambalay og Sistema aron malikayan ang dugang pang kalibog.

Atong tinoon ang atong padulngan ingon man ang atong misyon. Kun ang mga tawo dili malipay pasagdi sila kay after all wala ka mangulo aron sila lipayon, nangulo ka aron molihok segun sa kabubut-ong Diosnon.

Walay pugsanay, ug si bisan kinsa nga dili motuo sa imong baruganan ang walay katungod nga mokuyog sa imong panaw, ni ipamugos mo ang imong presensiya ngadto nila ni ang ilang presensiya nganha nimo.