Giusab ni Presidente Bongbong Marcos, Jr., ang iyang singgit-panawagan (chant) sa pag-endorso sa iyang senatorial slate human mobiya sa grupo si Senador Imee Marcos. Inay "Labingdalawa, Alyansa”, giusab na kini ngadto sa “Alyansa All the Way.” Dakong tampaling kini’ng pagbiya ni Senador Imee Marcos sa pundok. Bisan gi-adjust dayon nila ang ilang singgit-panawagan, dili mataabunan niini ang mahimong epekto sa hunahuna sa mga botante. Matud pa sa akong amigo, “Mao tingale nga wala sila mogamit sa pulong nga “Labing-isa” kon ‘onse’, kay pangilad man ang lintunganay sa maong pulong.” Madahaan!
Laos na dayon
Gitangtang sa social media platform nga TikTok ang 4.5 milyones ka videos sa tibuok nasud tungod sa paglapas niini sa mga community guidelines. Ang mga video nga gitangtang mao kadtong nga nagpromote og violence, sexual abuse ug pangabuso sa kabataan ingon man human trafficking. Maayo kining gibuhat sa TikTok kay daghan ang mga iresponsable’ng netizen ang magpatuyang lang sa pag-post nga walay paghunahuna. Apan alang sa akong amigo’ng Tiktoker, dili makatarunganon kaniya kining polisiya sa Tiktok kay matud pa niya, “Wala pa gani siya mosikat, diretso na dayon siya pagkalaos.” Fezteleern!
Maglana’g potot
Nagtuo si Senador Bato dela Rosa nga angayan lang ipadala sa Senate panel on foreign relations ang mga kasayuran nga nahipos niini ngadto kang US President Donald Trump sa tuyo nga ma-freeze ang mga asset sa tag-iya sa eroplano’ng Gulfstream G550 nga gipasakyan ni kanhi Presidente Duterte ngadto sa Netherlands. Wala man gani mataral sa hukmanan ang taga-dinhi nga mismo maoy nagpadala sa kanhi presidente sa Netherlands, kadto pa kahang wala pa mailhi. Suntok sa buwan kining sugyot ni Senador Bato, ug haum sa giingon sa mga katigulangan nga, “May’pa maglana siya’g putot.” Ateerr!
Anagon man diay
Sumala kang Senador Christoppher “Bong” Go, luya ug dilli na maghatag kadaut si kanhi Presidente Duterte tungod kay tigulang na kini. Dugang pa sa senador, alang sa tawhanong konsiderasyon, angayan na siya nga atimanon ug respetohan subay sa atong kultura. Ang katiguwangon ug ang kaluyahon man lang tingale ang tinuod sa gisulti ni Senador Bong Go. Apan sa hisgutanan nga dili na siya maghatag og kadaut, labi na ngadto sa administrasyon, dili pa kini hingpit nga matuohan. Matud pa bitaw sa hamtong nga gisaway sa dalaga kay tigulang na kuno, daling mitubag sa pag-ingon nga, “Paniti, di ba makaingon ka nga ‘anagon man diay.” Atala lagee!
Minimum wage tanan
Nanawagan ang Makabayan bloc sa kongreso nga atimanon na sa Malacanang ang pag-certiy nga dinalian ang wage increase bill uban ang pagsaway nga mas sayon pa hinoon sa gobiyerno ang pag-aksyon sa mga pag-usbaw sa pamasahe. Ni’ng tug-og-war tali sa mga mamumuo ug mga negosyante, morag lupig ang mga mamumuo labi na kay morag adunay ayuda ang mga negosyante gikan sa kagamhanan. Sugyot sa akong amigo,”Aron matibway ang tanan, i-minimum wage lang ang tanan sa goyerno gikan sa presidente, ngadto sa senador ug kongresman, hangtud na ang mga yano’ng kawani sa kagamhanan.” Pagkatoytoy!