Gikinahanglan ba ang pagtugot sa amahan kon sagupon ang bata?

Dear Atty. Divine,

Aduna koy anak sa pagkadalaga ug karon 5 anyos na. Gi-acknowledge ang maong bata sa iyang amahan apan sukad ko naminyo wa na mosuporta ang amahan busa ang akong bana ang nagsuporta sa tanan namo nga panginahanglan. Wa pa mi anak karon sa akong bana ug gusto sa akong bana nga sagupon ang akong illegitimate nga anak kay siya man sab ang giisip nga papa niini. Ang akong pangutana kun mamahimo ba nga sagupon sa akong bana ang bata nga dili pahibaw-on ang amahan niini? Unsay maayo namo nga buhaton aron matuman ang adoption? Daghang salamat.

Karen

* * *

Dear Karen,

Mamahimong sagupon ang imong illegitimate child sa imong bana basi sa RA 8552 kon Domestic Adoption Act of 1998. Kun maaprobahan kini sa korte then ang imong anak makonsiderar na nga legitimate nga anak sa imong bana ug mahimo na kining mogamit sa iyang apelyido. Apan kinahanglan gyud nga imong pahibaw-on ang matuod nga amahan sa imong anak labot sa maong adoption kay magkinahanglan man ikaw sa iyang consent kun pagtugot gikan kaniya. Basi sa desisyon sa Korte Suprema nga kinahanglan gyud ang consent sa biological parents sa bata aron sa pagprotihir usab sa katungod sa mga matuod nga ginikanan. Busa, kun imo nang makuha ang consent sa amahan then mamahimo na ninyong ipasaka sa korte ang inyong Petition for Adoption. Thank you and God Bless!

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.