Basura di kolektahon

Pabor si Cebu City Mayor Raymond Alvin Garcia nga ipatuman pagbalik ang estrikto nga pagkolekta sa mga basura nga dili kolektahon kadtong wa gilain-lain ang madugta ug ang dili madugta.

Apan kay manggiluy-on man si Raymond, dili niya gusto nga ipatuman dayon kini sa kinatibuk-ang 80 ka barangay sa siyudad. Gusto ni Raymond nga maghimo usa og “pilot barangay.”

Paglabay sa pila ka buwan, usa pa kini ipatuman sa kinatibuk-an na nga mga barangay sa Cebu City. Pastilan, kon dili gani kolektahon ang mga basura kay wa ma-segregate, pwerteng bahoa gyud.

Ang Solid Waste Management Board sa Cebu City maoy misugyot nga ipatuman gyud ang lagda nga gilatid sa ordinansa sa siyudad, nga gikopya sa Republic Act 9003, ang Ecological Solid Waste Management Act.

Ang lagda sa Republic Act 9003 naglatid gyud nga dili kolektahon kadtong mga basura gikan sa “source,” sa ato pa gikan sa kabalayan o lugar sa mga lumolupyo, kon wa kini ma-segregate.

Tan-aw nako, mosinta gyud ang kasuko sa katawhan kon dili hakuton ang mga basura. Ang puntariya sa ilang kasuko mao kadtong mga tawo nga dili gyud motuman sa balaod.

Busa, karon pa lang daan, kamong mga opisyal sa kabarangayan dinhi sa Cebu City, sugdi na ninyo pag-awhag ang inyong mga lumolupyo nga tumanon na gyud ang balaod.

* * *

Karong sunod buwan, magsugod na ang tinud-anay’ng kampanya sa mga kandidato sa mga lokal nga pwesto, sama sa gobernador, vice gobernador, provincial board members, mayor, vice mayor ug mga konsehal, apil ang mga kongresista.

Karon hinuon, makakita na man ta og mga politiko nga mosuroy sa atong mga lugar ug modiskurso, apan wa pa gyud sila miingon nga “vote for me.”

Ang tinuod, lisud kaayo ang pagpili kon kinsa ang angay’ng botohan kon wa ka gyud makaila sa tinuoray’ng pagkatawo sa maong mga politiko.

Kon anha ka lang mamati sa ilang diskurso, natural nga mopahiyom sila kaninyo, molamano bisan pa og hugaw ang inyong mga kamot aron pagkabig sa inyong botos.

Apan kon layo na sila kaninyo, modali-dali sila’g panghunaw og alcohol nga gidala sa ilang mga bata-bata nga nagkuyog-kuyog kanila.

Dinhi sa Cebu City, subra sa P100,000 ang binuwan nga sweldo sa mga konsehal, mao nga kinahanglang ang inyong padag-on kadto gyud nga mga politiko nga maayo aron dili mausik ang kwarta nga gikan sa atong buhis.

Karon pa lang daan, pagsugod na og lista kon kinsa nga mga kandidato ang inyong botohan sa eleksyon, gikan sa senador hangtud sa kinaubsang elected position sa inyong mga dapit.