Gitawgan ko sa akong amigo nga licensed firearm holder. Nasagmuyo siya nga sugod karong Domingo, gidid-an na sila sa pagdaladala sa ilang mga armas bisan pa’g duna sila’y Permit to Carry Firearms Outside of Residence.
Giingnan nako ang akong amigo nga wa gyud ta’y mahimo niana tungod kay usa kini sa nahunahunaang paagi sa Comelec nga mamenosan ang mga krimen nga maglambigit og armas.
Sugod karong Domingo, way labot sa mga polis, militar ug sakop sa mga law enforcement units sa kagamhanan, makadala lang og armas kon makakuha sila og Firearms Ban Exemption gikan sa Comelec.
Ang mga security guards gitugotan nga makahupot og pusil nga isyu kanila sa ilang agency, apan diha ra sa ilang mga dapit nga ilang gibantayan. Kon single post nga way kabinlan sa armas, madala nila ang ilang armas gikan sa ilang agency office paingon sa ilang mga post, ug anha moagi sa labing laktud nga agianan.
Pananglit ang agency office sa gwardiya anaa mahimutang sa Lahug, unya ang iyang pwesto nga gibantayan tua sa Pier 1, unya nadakpan siya nga nagdala’g armas didto sa Mambaling, dili na siya makapangrason ug makiha na siya.
Matud sa akong amigo nga ang kadagkoan sa Camp Crame mikwenta unta sa mga adlaw nga ang licensed firearm holder makadala sa iyang armas, ug kon dunay eleksyon, konhuran nila ang bayad sa paglukat og PTCFOR.
Husto pud. Sayonan ka nga P12,000 man ang bayad sa mga molukat og PTCFOR para sa mga sibilyan, gawas og senior citizens kay gamay ra ang iyang bayranan. Kay ang gun ban molungtad man og unom ka buwan, kon ang election ang pabayran unta P9,000 ra.
Kanang P12,000 nga bayad sa PTCFOR, ang legal pa gani na nga prisyo, pero sagad sa mga molukat makabayad gyud og P16,000 dala ang gitawag og “padangog” aron nga molusot pagdali ang permit.
* * *
Isip kanhi police ug military reporter, nasayod ko nga ang pagpatuman og gun ban dili hingpit nga makasumpo sa mga panghitabo atol sa election period, kay dunay mga politiko nga mogamit og mga tawo nga dunay armas nga dili lisensyado, ug dili mopatuo og gun ban.
Maayo unta og paspasan gyud sa kapolisan ang paghimo’g kampanya batok sa mga malapason sa gimando nga gun ban. Alang sa mga wa pa masayod, kon mahukman ka nga sad-an sa mga election-related nga mga kaso, mapriso ka gyud kay dili kini apil sa mga kaso nga mahimong maka-avail og probation.
Mao nga pagmatngon gyud mo mga magbabasa sa Renbor Patrol.