EDITORYAL - Gitihik ang kabilya?

Nabaniog karon ang balita kabahin sa matud pa ‘substandard’ nga gitukod nga riprap diha sa Butuanon River, partikular na sa may Barangay Maguikay sa Dakbayan sa Mandaue.

Ang mga pasangil naglakip sa giingong paggamit lang og kawayan imbes nga kabilya sa dihang gihimo kini. Tungod kay human natumpag ang riprap, na-expose man ang sud sa kongkreto.

Ang maong riprap gikataho nga proyekto kini sa Department of Public Works and Highways-7 alang sa nasudnong kampanya batok sa mga pagbaha o flood control projects nga gigahinan og P127 milyones.

Daghan ang nangutana nganong kawayan man maoy gigamit ug dili kabilya? Usa pa, murag makaduda gyud kun tinuod kini nga pasangil. Kadako sa budget sa proyekto unya mura og gitihik-tihik ang kabilya nga gigamit.

Apan kun ang kontraktor maoy pasultihon, dili kadto substandard, gisunod ra nila kun unsa ang desinyong gipabuhat kanila sa DPWH.

Gihimakak sab nila nga kawayan ug dili kabilya ang gigamit. Giklaro sa kontraktor nga wala sila mogamit og kawayan, apan kadtong 15-tiil nga bahin nga natumpag giangkon niini nga wala gyuy kabilya didto, kay gisunod ra gyud nila ang desinyo.

Daghan gyud hinuon og posibleng hinungdan nganong nahitabo kini, kaning pagsige og uwan, ug kining gialegar nga tubig gikan sa usa ka kompanya duol sa lugar nga napundo ug nakapahumok og maayo sa yuta.

Kaning mga rason posible gyud nga tinuod, apan dili ikalimod nga kadtong riprap mura og kuwang gyud og mga kabilya sa pagka-desinyo palang daan.

Kinsa may nidesinyo niini, nganong lagyo kaayo ang kabilya nga mura og tihik man kaayo ang pagkabutang niini nga unta tubig baha man ang buot pugngan sa riprap?

Kung nahitabo kini aning bahina sa riprap sa Butuanon River, dili na ikahibulong kun sa mosunod nga mga adlaw nga dunay grabeng mga pagbaha , duna na say mangatumpag niini kay mao ra man gyud tingali ang desinyo niini.

Pagkaanugon sa budget sa gobiyerno para niini, kinsa may angay basulon sa nahitabo? Kinsay angay manubag?