Nabantang atol sa pag-atubang ni kanhi Presidente Rodrigo Duterte sa Senado niadtong Lunes ang iyang kamingaw sa nasudnong atensiyon. Dili paigo para niya ang panagsa nga press conference sa Davao City nga pipila ra ka reporters ang nangutana ug SMNI ray nag-livestreaming.
Labihang lingawa niya nga hapit tanang media organizations nisibya sa iyang testimoniya sa pagsugod sa imbestigasyon subcommittee sa Senate Blue Ribbon Committee sa extrajudicial killings sa drug war sa iyang administrasyon. Nakalimot gud nga giimbitar siya aron pagpanubag sa mga pangutana, ug dili aron yukboan, sa mga senador.
* * *
Nagsalig tingali nga dili mangahas ang mga senador sa pag-contempt ug pagtanggong niya, si Duterte nilusad sa iyang naandan nga pamalikas, pagbugal-bugal, pagpanginsulto, pagtuyuk-tuyok, pagbalik-balik ug pagpamugos sa simang nga mga tubag sa mga pangutana.
Nagtuo tingali nga si Senador Risa Hontiveros ray nagtuon ug dunay katakos ug kaisog pagsukit-sukit niya, gisalikway ang tanang pagmatngon sa iyang sinuwat nga opening statement ug nikumpisal sa tanang mga krimen nga gipasangil batok niya. Sa nukus-nukos nga paagi (kahibawo na ta kinsay giliwatan sa iyang anak) nga dili siya maapiki sa korte.
* * *
Nanghambog nga daghang napatay ug nanghagit nganong walay kaso nga gipasaka batok niya. Nipasiatab nga nagtukod siya og death squad pero wala na kahinumdom kinsa ang mga sakop ug mga biktima.
Si Hontiveros ray nisukod sa kamatinud-anon sa pag-angkon og hingpit nga responsibilidad sa drug war pinaagi sa pagpangutana angkunon bang siyay responsable sa pagpatay ni Kian delos Santos ug ubang mga bata nga walay armas ug wala mosukol. Nilubad si Duterte pag-ingon nga polisiya ray iyang duphan.
* * *
Sa hawanan sa Senado nabatyagan pagbalik ni Duterte ang gahom sa iyang tingog niadtong nagtungkawo pa sa Malakanyang. Nga bisan tungang gabii nag-atang ang tibuok nasud kinsay sunod niyang balikason, ipapriso, o ipapatay.
Pero hastang iyang alyadong mga senador gipul-an niya. Gipahibawo siyang nahuman nang ilang mga pangutana ug mahimo na siyang mobiya. Pero niinsistir si Duterte pagpabilin. Aron magpadayon pagtubag og mga pangutana bisan mabuntagan pa. Gihidlaw sa mga adlaw nga walay mangisog pagbaraw niya. Nakaamgo nga bisan unsaon pa og salida wala na siyay gahom pagpugong sa nagsugod nang mga adlaw sa panudya.
* * *