EDITORYAL — Climate change sa plataporma

Naglanog-lanog ang grabeng suporta sa mga tawo sa ilang tagsa-tagsa ka mga kandidato sa lokal nga bugnong lugaynon sa tuig 2025.

Nakita kini sa pagdasok sa mga tawo diha sa mga buhatan sa Comelec samtang nagduso sa ilang mga sertipiko de kandidatora ang mga kandidato.

Apan dili unta basta lang ang ilang paghatag og suporta, angay gyud unta nga duna kini tumong. Tumong nga alang sa ikaayo sa ilang mga lokalidad para sila molambo ug makat-ong mabuhi ug gawasnon.

Sagad man gud aning ubang mga supporters, “nakaila” lang sila sa kandidato, apan dili gyud personal nga kaila.

Samtang ang uban, klaro kaayong nikuyog lang sa panon tungod sa mga ‘freebies’ o hatag-hatag sa kampo sa kandidato sama sa mga t-shirts nga dunay dagway sa kandidato o pangalan sa ilang partido, aron ingnong daghan ang nisuporta.

Kining mga nadala lang sa hulhog, dili unta nila madala sa adlaw sa pagbotar ang kinaiyang madala sa sulsol.

Isip usa ka botante, pangitaan gyud unta nila ang mga kandidato og platapormang malungtaron ug dili imposibleng kab-uton o buhaton.

Pangitaan sila og plano bahin sa Climate Change, pagprotihir sa kalikupan, malungtarong panginabuhian o livelihood trainings para sa mga tawo, edukasyon,   seguridad ug uban pa.

Angay na hunongon sa mga tawo ang pagpangita og kandidatong kusog mosaad og mga ayuda sa kay kasagaran, dili kini matinuod.

Makat-on na unta karong eleksyona ang mga botante nga dili tanang sikat, makamaong mobuhat sa mandatong ihatag kanila.

Naay mga politiko nga kasamtangan karong naglingkod nga nakadaog lang tungod sa ilang kasikat apan walay nabuhat sa ilang trabaho, ang uban gisaway pa gani kay daw nagpabadlong lang hinuon ug niabusar sa gahum.