Mga muklo wala makatiklo

Makalingaw ang nahitabo sa 2025 Office of the Vice President (OVP) budget hearing sa Kongreso sa miaging Agosto 27, 2024, diin ang sub-chairman Kongresista Stella Quimbo ug ubang kaubanan, kinsa may gipanghuptang scripted plan gamit ang kanhi OVP 2023 confidential fund, diin dili na angay hisgotan, silang tanan pulos nasupalpal sa prangkang tinubagan ni Vice President Sara ‘Inday’ Z. Duterte:

“I will forgo the opportunity to defend the OVP’s budget through a question and answer sessions.  I will leave it to the House to decide on the budget submitted.” Kini ang pahayag-pahimangno ni Inday sanglit napresentar na niya tanan kon giunsa paggamit ang miaging 2024 budget ug ang asa paingon ang gi-propose niyang 2025 OVP budget?  Usab, may kopya na niini ang mga kongresista.

Pero gahig ulo si Quimbo ug iyang kaubanan, kinsa pulos usa ray unod sa ilang mga pangutana – confidential funds-confidential funds nga out of topic na. Hinungdan, milabok ang agila sa Davao City: “Is it part ba of what you said earlier, Representative Quimbo, that let’s stick to the plan? Yon ang narinig ko sa inyo kanina.’ Haskang dalia nakapamakak ni Quimbo. Pero dihang gi-rewind ang recorded video, siya miingon: “I ruled to stick to the plan.” Aw, puwerting igoa sa bakakon! Si Inday natimbrihan na daan sa iyang trusted informant sa Kongreso, nga nagplano tanang committee members sa maong hearing, nga pisakon si Inday. Maong nadiskartihan kini niya unsaon pag-counter? Gani miprangka, wala siya magdalag assistant officials. Aron ingkasog mosugmat ang salawayong sakit sa Kongreso – ang pag-cite in contempt, at least, si Inday ra. Ug dili maapil iyang kaubanan, kinsa may pamilya intawong nagpaabot sa ilang panimalay.

Ang mga birador-hambogerong Kongresista, labi na kadtong mahilig sa ‘Yes or No’ ray ipatubag? Wala makaporma!  Ang makapadayeg pagsamot, kay kutob sa kongresistang mibangga ni Inday, iyang gipanghukasan aron makita unsay depekto? Busa makita sa ilang nawong ang pagkatarantar-pagkahisagmuyo-pagkaguba sa giandam nilang lit-ag sa agila, diin sila hinuoy nangalup-og.

Mao na lamay nahimo sa mga muklo, ang pag-defer sa nahisgotang budget. I-zero kaha nila ang 2025 OVP proposal budget ni Inday, kinsa wala nila ma-trapped-tiklo?

Ato ning masayran sa sunod nilang hearing!