Diay akong tambag

Kadtong mga magtiayon nga nag-away ug nagbuwag-buwag, tambag nako ninyo nga pag-uli na mo sa maayong kabubut-on kon may tinguha pa mo nga magpadayon ang inyong kaminyoon.

Abi ninyo’g ngano? Gihimong sayon karon sa Supreme Court ang pag-anular sa kaminyoon sa usa ka magtiayon kon sila wa na magtipon ug dunay usa kanila nga wa na makatuman sa ilang marital obligation.

Si Leonora mipasaka og Petition for Nullity of Marriage batok sa iyang bana nga si Alfred, kay human sa ilang kaminyoon niadtong 1984, nausab ang batasan niini ug mao nga kanunay na lang silang mag-away.

Matud ni Leonora nga nabatyag niyang wa na siya isipa sa iyang bana nga usa ka asawa, kondili, mora na lang og giisip siya nga katabang sa balay.

Dili na moentrigar og kwarta si Alfred ngadto kang Leonora nga magasto unta sa ilang pagpuyo uban sa ilang mga anak, ug nahibaw-an ni Leonora nga nalambigit na diay ang iyang bana sa daghang mga babaye.

Ang nakagrabe gyud kay matud pa nga nakigminyo kini’g laing babaye nga nakahimo siya og bigamy, apan wa pa mahibaw-i kon gipasakaan ba ni Leonora og kaso ang iyang bana. Ang Regional Trial Court (RTC) mibasura sa petisyon ni Leonora nga ipaanular ang kaminyoon niya ug ni Alfred. Ang hukom sa RTC, gisuportahan sab sa Court of Appeals.

Kini maoy rason nga si Leonora midangop sa labing taas nga hukmanan sa nasud, ug didto siya nakakuha og hustisya sa gidangatan sa iyang kaminyoon.

Matud sa Supreme Court nga ang pagbiya sa bana, o asawa, sa ilang panimalay nga way balido nga rason, maisip kini nga ebidensiya nga nakahimo siya’g psychological incapacity ug wa siya makatuman sa iyang marital obligation, ug mahimo kini nga basehanan nga ma-annul ang kaminyoon.

Sa ato pa, ma-annul gyud ang kaminyoon nilang Leonora ug Alfred. Busa kamo diha nga susama niini og sitwasyon ang inyong kaminyoon, hinuktuki ninyo pag-ayo.

* * *

Kalooy man diay sa mga tigtanom og mga gulay didto sa kabukiran sa Dalaguete no? Barato ra kaayo ang kumpra sa ilang mga abot, unya inig-abot dinhi sa Carbon, mahal na ang baligya sa mga mapahimuslanong kumprador.

Dili sayon ang pag-alima og mga utanon, unya gastohan pa og abuno. Dihang ibaligya na, kumprahon lang og barato. Tiaw mo nga ang kilo sa repolyo paliton lang og P6.00.

Unta, ang kadagkoan sa lungsod sa Dalaguete, ug mga silingang lungsod, motan-aw niining problema sa ilang mga lumolupyo nga mora’g giabusohan sa mga kumprador.

Ang irason nila nga barato kuno kay abunda kaayo ang mga utanon sa Carbon. Unya, nganong mamalit man sila kon abunda pa?