Maminaw sa kwarta

Matud pa ni Presidente Marcos, aduna na siya’y ideya kon kinsa ang mga “ulo nga moligid” kabahin sa pag-ikyas ni Bamban, Tarlac Mayor Alice Guo.  Dugang pa sa presidente, mga personahe sa immigration ang nalambigit sa maong anomaliya sa pag-ikyas ni Guo.  Tataw nga adunay nahitabong dako’ng kurapsyon sa buhatan sa immigration.  Apan dili lang kurapsyon ang isyu ni’ng hitaboa kon dili ang dakong tampaling ngadto sa administrasyon nga gitoohang nagmabinantayon aron dili makalayas si Guo.  Tinuod gayod ang pagya nga, “Kon kwarta na gani ang mamulong, ang tanan maminaw gyud.” Madahaan!

Unsaon pagka-luwas?

Gipanalipdan ni Presidente Marcos ang desisyon pagpadala og 2,000 ka mga police officers aron lang sa pagdakop ni Pastor Quiboloy kinsa gi-akusar sa sala nga sex trafficking.  Mokabat og 30 ektarya ang lugar nga gitagoan sa pastor busa dili kuno mahimo nga magpadala lang og usa ka dosena nga polis.  Bisan sa kadaghan sa gipakatap nga mga polis wala gihapon nila makit-i si Pastor Quiboloy.  Nabalaka ang akong amigo niini’ng pagkawala sa pastor kay matud pa niya, “Nag-ingon ra ba si pastor nga siya maoy katapusang mopirma alang sa kaluwasan sa tawo.  Unsaon pa nako pagka-luwas nga dili na man siya makit-an?”  Pagkatoytoy!

‘Imo-Imo’ na laman na

Namahayag si Iloilo City Mayor Jerry Trenas nga ang banay ni kanhi presidente Rodrigo Duterte nahimo na’ng irrelevant sa politikanhong talan-awon o kahimtang sa nasud.  Mahimo nga sa Iloilo wala na’y bili ang mga Duterte apan sa Davao ug sa ubang bahin sa Mindanao ug Visayas, aduna pa gihapo’y impluwensa ang maong banay.  Komento pa sa akong amigo, “kon dili pa sila relevant, ngano nga sigehan man og imbestigar ang mga Duterte?” Mao na’y giingon sa akong apo, agi’g sagang niya kon imo siya’ng pakasad-on nga, “Imo-imo na laman na Tay.”  Ateerr!

Nilabayay og Lapok

Gipanghimakak ni Bise Presidente Sara Duterte nga politikanhong himan ang iyang gisulat nga libro nga giulohan og “Isang Kaibigan” sa tuyo nga mapatuboy ang posible niyang kandidatura sa tuing 2028.  Gipasabot ni Duterte nga ang mogamit sa maong mga libro mao kadtong mga tinun-an sa elementarya nga dili pa gani makabotar sa eleksyon sa 2028. May punto ang bise presidente ug morag gi-inat ra pag-ayo ang hunahuna sa tawo kon ipugos nga may bulok pamolitika ang paghimo sa maong libro.   Mao kana’y giingon nga, “Layo pa gani ang eleksiyon apan nagsugod na og nilabayay og lapok ang mga karajo.” Fezteleern!

Political Dynasty

Nagtuo si Senador Robin Padilla nga “morally wrong” ang political dynasty maoy hinungdan nga gidid-an niya ang iyang igsoon sa pagdagan pagka-senador.    Gidili mismo sa atong Konstitusyon ang political dynasty apan, bisan sa pamahayag ni Senador Padilla, walay naumol nga balaod alang niini.  Ni’ng gihandum nga kausaban, angkonon nato nga “Mas dako pa’g kahigayonan nga moputi ang balhibo sa uwak ug mo-itom ang balhibo sa tabon kay sa mapasar ang balaodnon batok sa political dynasty.”  Muleeng!