EDITORYAL - Kuwang sa maintenance?

Ang kaluwasan sa karsada importante para sa tanan, dili lang para sa mga motorista kondili hasta sa mga tawong mogamit niini. Mao nga daghang mga gipangmuntar ang gobiyerno pinaagi sa Department of Public Works and Highways nga mga road safety features.

Gikan sa mga traffic lights, traffic directional ug cautionary signages ug daghan pang uban nga wala na gani kaayo mailhi sa mga tawo ug wala masayri kun unsay gamit niini sa publiko ilabi na sa mga motorista.

Usa niini kaning bag-ong mga gipanglubong nga mga solar stud lights o ‘cat’s eye’ nga naglinya diha sa tungatunga sa dalan. Makatabang kini sa mga motorista ilabi na sa mga dapit nga kuwang ang mga suga sa mga poste sa daplin sa dalan.

Ang maong mga suga gamit kaayo para sa mga motorista nga makita ang lane ug aron dili sila basta-basta lang magtipas-tipas sa gisubay nga dalan.

Gani sa ubang mga nasud, nakadaginot sila sa enerhiya tungod kay wala na sila magbutang og mga sugang dagitabnon sa mga poste kondili kani nalang mga cat’s eyes, sagad nila kining gipamutang sa mga super highways o mga highways.

Apan inay nga para magsigurong luwas ag motorista, dunay mga cat’s eyes nga maoy nakaingon sa disgrasya kay nagsugod na og kaukang ug nangalagpot sama sa nahitabo sa Mandaue City sa miaging gabii nga naagian sa Banat News, usa ka motor ang nalamba human nakaligis og naukang nga cat’s eye, naangol ang sakay nga babaye ug lalaki.

Wala man hinuon magpasabot nga dinhi sa Pilipinas, wala atimana sa DPWH ang maong mga imprastraktura. Alang sa kasayuran sa tanan, ang mga karsada dili tanan ubos sa pagatiman sa DPWH kondili naa say sa mga lokal nga public works sa mga LGUs o engineering departments.

Apan dili sab ikalimod nga dunay daghang bahin sa mga kadalanan sa sud man o sa gawas sa hurisdiksyon sa mga LGUs ang wala maatiman. Dili ba angay kanunayon ang pag-inspeksyon niining mga gipangmuntar sa kadalanan?

Dunay mga road safety measures nga nagkaguliyang na ang hitsura, depektosong traffic lights, kuspaw nga mga pintal nga di na mabasa.

Murag nawala na ang kapuslanan nganong kini gibutang sa lugar, ang nakapasubo lang, usahay mao pay hinungdan sa aksidente.