Gold medal ug konsiyerto

Nahugyaw ang tibuok nasud na dihang gilangkat ni Carlos Yulo ang bulawang medalya sa men’s floor exercise sa gymnastics kaniadtong Sabado sa gabii sa kasamtangang Olympiada nga didto gipahigyon sa Paris, France.   

Sa makausa pa, gipakita ni Yulo nga angay siyang ibayaw ngadto sa entablado sa mga banggiitang gymnasts sa kalibotan. Ug makapaabot kitang mohakot pa unya siya’g mga medalya sa umaabot nga internasyonal nga mga kompetisyon.

Niining iyang kadaugan, nabutang na usab ang Pilipinas sa mapa sa mga nasud nga mipakita og maayong labok sa Olympiada. Ug hinaut nga ang ubang atleta sa nasud buligan usab sa ilang paningkamot nga makab-ot ang medalya didto sa Paris.

Hinuon, sa akong obserbasyon, dako na og improvement ang atong mga atleta sa natad sa international competitions. Kini bisan pa man sa mga problema sa suportang pinansiyal gikan sa nasyonal nga kagamhanan.

Mao nang angay lamang nga mahigmata ang mga hingtungdang ahensiya sa gobiyerno mahitungod sa kaimportante sa maayong pag-aroga sa atong mga atleta, gikan sa ilang kabataan ngadto sa ilang pagsangka sa mga propesyonal nga kompetisyon.

* * *

Gatusan ang nalingaw sa dakong konsiyerto niadtong gabii sa July 26 sa Sacred Heart Center sa may dalang Jakosalem ning dakbayan sa Sugbo. Tiaw mo nang naglanoglanog ang mga banda sa ilang maayong performance nga nakapasadya sa tanan.  Usa ko sa misaksi sa “Rockin’ 60s Concert” diin pipila ka banda sa Sugbo ang misalmot ug mipakita sa ilang talagsaong talento. Sa maong pasundayag, nalingaw gayud ang gatusan ka baby boomers nga ang uban gikan pa sa gawas sa nasud sama sa Estados Unidos ug miuli aron lamang pagsaksi.

Gumikan niini, dako ang pasalamat nilang Sir Raul Laurente ug Sir Rod Ngo, ang duha sa mga nagpaluyo sa maong konsiyerto, sa dakong kalampusan niini. Nahurot ka puno ang mga lamesa sa maong benyu.

Ug nagpasabot lamang kini nga popular gihapon sa mga Sugboanon ang mga awit sa mga dekadang ‘60s ug ‘70s. Tungod niini, dili ko matingala kon moplano na usab silang Sir Raul ug Sir Rod, ug ubang organizers, og part 2 sa maong konsiyerto.