Mora'g naa, mora'g wala

Segun sa DPWH Secretary nga si Manuel Bonoan, adunay flood control master plan ang 18 ka mga dagkong river basins sa Luzon apan nalangan lang ang implementasyon sa maong plano tungod sa nagkadaiya’ng rason, usa na niini mao ang COVID-19 pandemic.  Apan mahinumduman nga atol sa usa ka senate hearing, namahayag si Bonoan nga walay flood control master plan ang DPWH.  Dali kaayo nakapangulipas ang kalihim pinaagi sa pag-ingon nga wala lang siya masabti.   Kon basehan ang pagtumbling-tumbling sa sinultihan sa kalihim, makaingon na lang kita nga “Basta flood control master plan ang hisgutan, mora kini’g naa, mora pud og wala.”  Madahaan!

“Walay nadato sa eskwela”

Sumala sa datos sa DepEd, adunay mokabat 23 milyones ka estudyante sa elementary ug high school ang mi-enrol alang sa school year 2024-2025, diin kapin sa 20 milyones niini anaa ma-enrol sa publikong mga tulonghaan.  Base sa gidaghanon sa nagpa-enrol, makita ang kasibot sa mga ginikanan sa pagpa-eskwela sa ilang mga anak.  Apan ang pangutana kon makalahutay ba ang mga ginikanan sa galastohan ug kon masustenihan ba ang kasibot sa mga tinun-an sa pag-eskwela luyo sa kawad-on?  Kanyahay ra nga adunay mga ginikanan nga mopaundang sa ilang mga anak pagpa-eskwela kay alang kanila, “Wala’y nadato sa pag-eskwela.”  Fezteleern!

Nagtingsi bisan namatyan

Giaprobahan na sa third and final reading atol sa plenary session sa Kongreso ang balaodnon nga gisang-at ni Kongresman Duke Frasco nga gihinganlan og “Affordable Funeral Service Act.” Tuyo sa maong balaodnon ang pagtabang sa mga kabos nga mahatagan ang ilang mga mahal sa kinabuhi nga mitaliwan na og desente apan barato’ng funeral services.  Dili na unya mosamot ang kaguol sa atong mga kabos nga igsoon sa pagtaliwan sa ilang paryente.  Daghan na unya kita’ng makita nga namatyan nga inay maghilak, magpunay na hinuon og tingsi tungod sa nadawat nga hinabang.  Pagkatoytoy! 

Milagro nga mokunhod

Luyo sa pagkunhod sa produksyon sa domestic harvest sa palay, mipasalig ang DA sa mga konsumidor nga magpabilin nga stable ang presyo sa bugas nga anaa sa P51 ngadto sa 53 ang kilo..   May’pa’g wala na lang kini ibalita.  Total mahibaw-an ra man gihapon ang presyo inig palit na sa konsumidor og bugas nga, sa tinuoray, mas mahal pa gani kay sa ilang gipasiatab. Pagkunhod sa presyo ang gihandum sa katawhan.  Apan tungod sa panagkunsabo sa mga rice traders ug uban’g mga opisyales sa kagamhanan, mora’g milagro ang atong gipangayo nga pagkunhod sa presyo.  Muleeeng!

Unregulated social media

Nanawagan si Presidente Marcos sa mga sakop sa Philippine media nga motabang sa pagpakigbatok sa mga fake news nga giingon’g nagkakuyaw tungod sa “unregulated social media” ug artificial intelligence.  Husto ang giingon sa presidente nga sayon ang pagpakatap sa “fake news” tungod sa “unregulated social media”. Apan angayan hinumdoman nga tungod sa “unregulated social media,” dali ug sayon ra usab sa katawhan masayran ang kurapsyon ug imoralidad sa atong mga opisyal sa kagamhanan.  Paleho la!