EDITORYAL - Suspensohon na sab

Maayo tingaling tarungon o usbon sa Department of Transportation ang ilang sistema ug mga proseso aning Public Transportation Modernization Program (PTMP) nga maoy nakaingon aning dugay kaayong pagkakompleto sa programa.

Daghan pang mga transport operators ang wala kasabot o naglibog ba kaha unsay proseso ani, pun-an pa nga mahal ang modernong unit nga kinahanglang paliton, kaning sa konsolidasyon ug kooperatiba ug uban pa.

Karon gusto sa mga senador nga ipahunong una tungod aning kalibog ug kalisdanan sa mga transport operators ug mga drayber nga makakuha og bag-o ug modernong PUJ.

Sa pagkakaron, 22 ka senador ang matud pa nipirma sa resolusyong giduso ni Senador Raffy Tulfo aron suspensuhon ang PTMP o Public Utility Vehicle Modernization Program (PUVMP). 

 Kun ang mga senador naglibog o gilisdan nagtan-aw sa kaagi sa mga operators ug drayber, duna gyud tingali problema. Hinuon kun tuohan ang pamahayag sa DOTr nga halos tanan nang transport sector ang nisanong sa maong programa, apan nganong duna pa may mga nangreklamo?

Kung ang suspensyon niini gamiton aron mausab ang sistema o proseso ug uban pa para mamahimong sayon sa transport groups, nganong dili man buhaton?

Ang gusto sa tanan nga mahuman na kini ug 100 porsiyentong mapatuman ang modernisasyon. Kay ang ubang mga modernong jeepneys nga napalit sa panahon pa sa kanhi administrasyong Duterte hinayhinay na baya sab og kaguba, tungod ba kaha kini sa kalidad o tungod sab sa kakuwang og pagatiman sa mga operators.

Naa ang tanang desisyon kang Presidente Ferdinand Marcos Jr., siya ray magbuot kun suspensuhon o padayunon kini. Hinuon, bisan suspensuhon kini, ang mga bag-ong aplikasyon lang sa mga bag-ong na consolidate maoy maapektahan, kadtong nahuman na ug naa nay modernong units magpadayon man og pamasahero.

Maayo sab kining nahunahunaan sa DOTr nga pamaliton kining mga karaang PUJs nga nagdagan karon aron adunay pasiunang puhonan ang operators pagpalit og modernong unit.

Asa may maayo kaha og unahon ug himuong prayoridad ang pagpalit sa mga “Philippine-made” nga mga pasaheroan kay mas barato man  kun itandi anang gikan sa China. Makatabang pa kini sa lokal nga patigayon ug makahatag og trabaho sa mga Pilipino ug labaw sa tanan molambo sab ang industriya sa pagpanghimo og lokal nga sakyanan.