Burukrasya sa WPS
Kon, simbako, layo ra to, tabukon og pito ka lawod, dunay emerhensiya nga moulbo nga maglambigit sa atong mga barko ug mga sundawo sa West Philippine Sea (WPS), di makahimo og bisan unsang lakang ang Armed Forces of the Philippines (AFP) ug Philippine Coast Guard (PCG) kon way pagtugot gikan ni Presidente Ferdinand Marcos Jr.
Ug ang presidente mag-agad sa rekomendasyon sa National Maritime Council (NMC) nga iyang gitukod niadtong Marso ning tuiga. Ang NMC kinahanglan nga mopatawag og tigom sa 12 ka sakop nga ahensiya una makaluwat og rekomendasyon.
* * *
Sa ato pa, kon ang emerhensiya mahitabo sa alas-2 sa kadlawon, ang unang mga sakop sa NMC nga makadawat sa kasayuran mao silang Defense Secretary Gibo Teodoro, isip labaw sa AFP, ug Transportation Secretary Jaime Bautista, isip labaw sa PCG.
Kinahanglang pahibaw-an ni Teodoro, nga posibleng mas sayon nga pukawon, ang pangulo sa NMC nga si Executive Secretary Lucas Bersamin. Kay 74 anyos na mang retiradong Chief Justice, ambot kinsay mangahas og panuktok niya ug ambot unsang orasa maka-aksiyon sa kasayuran.
* * *
Tigumon unang Bersamin ang mga sakop sa NMC, nga kasagaran nahigot sa trabaho: Si Interior Secretary Benhur Abalos nangita nilang Apollo Quiboloy ug Gerald Bantag; si Justice Secretary Boying Remulla nagsusi tinuod bang nakagawas sa house arrest si Arnie Teves sa Timor Leste; si Environment Secretary Toni Yulo-Loyzaga nagtimbang-timbang makapangisog ba batok sa pag-upaw sa bukid sa Balamban sama sa iyang pag-ulbo sa pagkagis sa Chocolate Hills; ug si Finance Secretary Ralph Recto nangawot unsaon paglaslas ang makalilisang pangutang sa administrasyon.
Mahimong alas-10 sa buntag na makaatubang ni Bersamin ang ilang mga representante. Alas-12 sa udto na silang makaluwat og rekomendasyon. Nga nahimo na unta nilang Teodoro ug AFP Chief Romeo Brawner pila ka gutlo human sa insidente.
* * *
Mahimong uwahi nang tanan. Ang dinaliang mga panghitabo sa WPS di makapaabot sa burukrasya.
Kay kinahanglang aprobahan sa presidente ang rekomendasyon. Nga makuha lang dayon kon di maatol sa usa sa iyang mga laag. Kay bakikaw nga hukman niyang kinabuhi ug kamatayon sa WPS samtang nag-abiba sa lumba sa labing luho nga mga sakyanan sa Formula 1 sa Singapore o sa unsang nasud nga mapilian.
* * *
- Latest
