Risgo na hinuon

Daghan ang nagyam-id dihang ilang nakita ang naglumbay nga mga lamppost nga gipabarog sa Osmeña Boulevard sa downtown area ilalum sa 'Link to Port' project nga kabalhin sa kaugmaran sa rapid bus transit sa dakbayan sa Sugbo.

Kini gumikan kay anaa na halos sa tunga sa karsada gitukod ang mga street lights ug klarong maghatag kini og dakong risgo sa katawhan. Kini labina sa mga motorista nga delikado nga mabangga kon dili makabantay niining mga lamppost.

Ako mismo kada adlaw nakabantay niining maong klase sa risgo. Ambot nganong gituyo man nila pag-ugbok kining maong mga lamppost sa halos sa tunga na sa karsada. Lisod sabton ang analysis niining maong proyekto.

Sa akong nahibaw-an, ang 'Link to Port' gituyo isip kabahin sa planong 'pedestrianization' sa downtown area sa dakbayan sa Sugbo ilalum usab sa lakang pagpreserbar sa historical sites sa maong lugar.

Gani sa mga hulagway nga atong makita sa social media, gikan sa duha ka lane, tagsa na lamang ka lane ang magamit sa mga  motorista sa Osmeña Boulevard, gikan sa P. Del Rosario Street hangtod sa Plaza Independencia.

Basi sa plano sa maong proyekto, dako nga porsiyon sa maong boulevard ang gihimong bike lane ug pedestrian lane. Insakto kaha kini nga ideya? Dili kaha magubot ang kamada sa trapiko? Dili ba nga pirming busy man dihang dapita?

Lisod sabton apan sa akong tan-aw, dakong problema sa trapitko ang motumaw unya resulta sa maong proyekto. Sayop kini nga konsepto gumikan kay dili ideal ang maong proyekto sa downtown area sa dakbayan sa Sugbo diin daghan nang nanag-iya og sakyanan.

Sa akong obserbasyon, late na ang implementation niining maong proyekto. Kon niadtong 1990s o 2000s pa giarangkada ang maong proyekto inubanan sa paghapnay sa modernong public transportation, nindot ug hapsay unta ang downtown area karong panahona.