Layo ra kaayo sa tinuod, damgo nga mamahimong urom

Niining plano karon sa lokal nga kagamhanan sa dakbayan sa Sugbo nga "Pedestrianization" sa downtown area nga sentro sa kasaysayan, nindot unta kaayo kay i-pattern man kini sa mga dapit didto sa ubang nasud nga seguradong mopatok gyud ilabi na sa mga tawo nga mora'g mobalik ta sa atong kagahapon kon ugaling mahinayon ug mahasubay ang ilang gidamgo.

Gani kong tan-awon ang plano nga gisugdan na sa pagpatuman karon sa Cebu Rapid Bus Transit kon CBRT impressive gyud samot na ang mga visuals nga ilang gipakita nga nag-viral gani karon sa social media.

Matud sa CBRT nga gisugdan nila ang kabahin sa ilang proyekto nga Link to the Port sa plano usab sa Cebu City LGU.

Ubos niining Link to the Port mao ang pagbutang og lane alang sa mga magbiseklita ug lahi nga lane alang sa mga pedestrian gikan sa Plaza Independecia hangtud na sa eskina sa P. del Rosario ug butangan usab og mga street lights.

Ang kasamtangan nga duha ka lanes nga naglangkob sa upat ka magkaatbang nga direksiyon mamahimo nalang usa ka lane nga subayon sa opposite direction kay ang masigka daplin sa karsada makaon naman isip extension sa sidewalk ug sa bike lane.

Gani dunay plano nga ang ipadagan nalang sa 1.15 kilometers nga Link to the Port mao ang mga tartanilla aron mabatyagan gyud ang kanhiay nga panahon kong masustinehan kini.

Apan mao ni ang plano, nindot ug matahom tan-awon apan unsa kaha ang gama sa realidad niini?

Basin mahulog lang kini sa expectation versus reality o damgo nga mahimong urom tungod kay ang reality sa atong sitwasyon layo ra kaayo sa tinood itandi sa ubang nasod.

Hilabihan naman gani ka huot ang mga sakyanan nga upat ka na linya ang agianan, unsa nalang kaha kong tag-usa nalang matag opposite direction.

Basin moabot na ang ulo sa Plaza Indpendencia samtang ang ikog toa pa sa Fuente Osmena.

Bakikaw kaayo nga gitinguha gani karon nga mapalapdan pa ang mga karsda tungod sa kadaghan na sakyanan, kining downtown pagamyan na hinuon. Pastilan, gusto kong motuo sa nindot nga plano apan basin madismaya lang ko kong dili matinuod ang resulta niini.

Sa pagsukod pa lang niining proyektoha, daghan na sabod kay dunay pagsupak sa Konseho sa dakbayan. Apan gitaod gyud gihapon ang mga street lights nga nakamugna og kabalaka sa mga motorista kay hapit naman naa sa tunga sa karsada og wala pa gyuy signage, simbako madasmag dako gyung problema.

Unta tun-an og maayo kini ayha ipadayon kay inay monindot ang syudad bahin molaksot na hinuon kini.