Mag-indigay og iningles

Miawhag si Senator Imee Marcos nga mohimo ang Senado og pakisusi kabahin sa panag-engkwentro tali sa mga Filipino troops ug Chinese Coast Guard niadtong Hunyo 17 didto sa Ayungin Shoal. Tumong sa maong imbestigasyon ang pagsuta kon unsay maayong buhaton aron mapanalipdan ang mga Pinoy nga tripulante ingon man ang atong soberiniya.  Wala pa ba diay masayod ang atong mga senador kon unsay angayan buhaton batok niini’ng dugay na nga tinonto sa China?  Sa ato pa diay, samtang gipanamastamasan na sa China ang atong mga mananagat ug kasundalohan, mag-indigay pa ang mga senador kon kinsa kanila ang labing maayo mo-iningles.  May’pag moligeed! 

Nahisama sa lusay

Matud pa sa Malacanang, dili pa maingon nga usa ka armado’ng pagpangatake ang gibuhat sa Chinese Coast Guard nga pagdasmag ug pagluwan sa usa ka barko sa Philipine Navy nga miresulta sa pagka-angol sa usa ka tripulante, busa dili pa usab ma-apply ang probisyon sa 1951 Mutual Defense Treaty. Inay mangisog, mora’g ang atong mga opisyal na man hinoon ang nangayo’g dispensa sa gibuhat sa Chinese Coast Guard.  Nahisama na lang hinoon kita sa lusay kansang baruganan nag-agad sa balod ug sulog sa kadagatan nga maoy nagpahigayon kon asa kini nga baybayon maanod ug mosapigad.  Fezteleern!

Piloto nga mag-uuma

Giawhag sa Philippine Rice Research Institute (PhilRice) ang atong mga mag-uuma sa pag-gamit sa drone technology aron mousbaw ang ilang mga abot ug mokunhod usab ang ilang production cost.   Kon mapatuman sa hingpit ang maong proyekto nga ginganlan sa PhilRice nga Drones4Rice project, mapanglantawan nato nga mogaan na ang trabaho sa atong mga mag-uuma.  Ang ilang pagpanguma nahisama ra nga nagpalupad sila’g tabanog.  Inig palupad na unya nila sa drone, dili lang sila tawgon nga mag-uuma, kon dili tawgon usab sila nga “piloto.”  Muleeng!

Sige’g mulo, sige’g timo

Gisaway ni Senador Grace Poe ug ni Senador Raffy Tulfo ang paghatag og pabor sa DOTr sa mga sakyanan gikan sa abroad, labi na ang gikan sa China, nga ihulip sa mga traditional jeepneys ubos sa Public Utility Vehicle Modernization Program (PUVMP).  Balido ang mga punto nga gitumbok sa duha ka senador sa ilang pagsaway sa DOTR.  Apan gawas niini, daw dakong baligho nga bisan sa atong kasungian sa China diha sa West Philippine Sea, nakig-alayon gihapon ang usa ka sanga sa gobyerno kanila.  Makapahinumdom sa akong amigo nga samtang nanaway sa sud-an kay dili daw lamian, nagsige pud og hungit ug ubay-ubay na ang nahurot.  Mao kana’y giingon nga “Sige og mulo, sige pud og timo”.  Madahaan!