EDITORYAL - Pagkabuak sa UniTeam

Usa ka maayong lakang ang gihimo ni Bise Presidente Sara Duterte-Carpio pag-resign sa iyang pagka kalihim sa Department of Education ug pagka vice chairperson sa National Task Force to End Local Communist Armed Conflict (NTF-ELCAC).

Samtang daghan ang nangutana kung unsay bug-at nga rason kun nganong iya kining gibuhat, dili naman tingali kinahanglan pa niyang moesplikar kun ngano.

Klaro naman daan sugod palang sa pagporma sa ilang “UniTeam” sa kampo ni Presidente Ferdinand Marcos Jr. niadtong panahon sa eleksyon nga “pakitang-tao” ra ang ilang panaghiusa aron makaporma og lig-ong koponan batok sa Liberal Party ug sa ubang kandidato.

Apan dili man kini maoy gibantayan sa mga botante, ang ilaha man kun kinsa ang sikat ug trending pirme ug humot sa mga balita ug social media maoy sukaranan sa ilang matam-is nga boto.

Ang pagkanaog ni Duterte sa pagka kalihim sa DepEd ug sa NTF-ELCAC epektibong nagtangtang kanila sa sirkulo sa gabinete ni Marcos.

Dili na sab siya ma presyur sama sa ubang mga kalihim ug may kagawasan na siyang makahimo sa iyang gusto.

Usa pa, delicadeza pud kini para sa iyang kaugalingon sanglit dili man sab mahimong dili siya mobarog para sa iyang amahan nga si kanhi presidente Rodrigo Duterte kinsa dayag kaayong nakig-kontra sa admnistrasyong Marcos karon.

Ang pagbiya ni Duterte, nagbutang na karon og klarong linya nga nagpataliwala sa kampo niini ug sa mga Marcos.

Makapaabot gyud ang katawhang Pilipino nga dunay init nga panagbayloay tali sa duha ka kampo samtang magkaduol na ang eleksyon.

Apil na niini ang pag-iyahay og dinaotay sa usa’g-usa ug pagwadwad sa mga kahiwian ug iregularidad sa usa’g-usa.

Aning paagiha, makatabang kini unya sa mga Filipino ilabi na niadtong mga seryuso ug naghatag og gibug-aton sa ilang nag-inusarang boto sa pagpili og sa ilang tan-aw maoy mas angayan nga ibutang sa Malacañang ini og tapos sa termino ni Marcos karong 2028.