PDS Padre Damaso Syndrome

Klarohon nako nga pipila lang kini sila nga adunay ingon niini nga kinaiyaha hangtud karon kay ang tinuod mas daghan o ang kinabag-an sa mga alagad sa simbahan adunay malumo nga kasingkasing kinsa maantigong mosabot sa sitwasyon sa mga parokyano sama sa akong mga higalang pari nga mga buotan.

Apan subo palandungon nga aduna pa gihapoy mga pari nga malimot usahay sa hiyas ug mithi nga maoy gitisok sa alimpatakan kanila ni Pope Francis nga ipatigbabaw ang compassion. Gani ang Santo Papa mohawok pa gani sa tiil sa mga piniriso nga nagpakita sa pagmapahiubsanon.

Ang nahitabo sa kasal didto sa lungsod sa Amlan sa Negros Oriental angayan nga hinuklogan sa mga tawo nga nalambigit, apil na ang pari.

Tungod lang sa wala pagkasinabtanay naguba ang adlaw sa kaslonon ug naguba usab ang reputasyon sa pari.

Nagsugod ang tanan dihang nangmarites ang ninang nga nag-alagad usab sa simbahan nga nauswag ang oras sa kasal inay alas otso sa buntag gihimo kunong alas 9:30 sa buntag. Maong kampante kaayo ang couple nga okey ra ang tanan ug niabot sila alas 9 sa buntag, apan gisugat sila og kasaba sa mga staff sa simbahan kay na-late sila sa schedule.

Gisamotan pa sa gihimo sa pari nga dihang nitungtong sa pultahan sa simbahan ang bride, gisugdan naman sa pari ang seremonyas hinungdan nga nagkapandolpandol ang bride ug hapit pa madagma sa pagpaso padung sa altar. Ug gilabtikan pa sa pari sa pagkasaba.

Nangayo na og pasaylo ang simbahan kay nadala ra daw sa emotion. Apan the damage has been done, matud pa sa uban.

Hinuon masabtan ra nato nga gitan-aw lang sa pari ang sunod niya nga misahanan, na mao ang naghuwat nga patay sa alas 9:30 sa buntag nga nalangan tungod kay late man ang mga kaslonon.

Apan dili nako kini madawat nga rason kay syaro naman sad, wala nalang niya hatagi og dignidad ang bride nga mopaso bisan tres minutos man lang.

Labaw sa tanan wala nalang unta niya kasab-i atubangan sa mga tawo ug atubangan sa altar sa Dios.

Dili lang ang kaslonon ang gibastos sa pari kon dili mismo ang Sakramento sa Kasal nga gikan sa Ginoo. Angayan gani malipay si padre nga bisan og na-late naningkamot gyud ang kaslonon nga modawat sa Sakramento sa Kaminyoon.

Usahay malimot ang tawo kong masanapan na sa kasuko ang iyang gibati, kong mortal sin man ang pagka-late sa kalihokan sa simbahan siyaro og dili niya mapasaylo. Mangasuko ra ba ang mga defender ni pader kay gisaway o gi-bashed tungod sa iyang gihimo.

Sakit gyud nga masagpaan sa kamatuoran nga dili kumo pari ka mahimo na nimong ipakagamay ang ubang tawo. Unta siya ang magsilbing sumbanan sa kapasayloan sa mga sala kay siya ang nag representar ni Hesukristo dinhi sa kalibotan.