Crackers sa Ayungin
Nadani akong pagtagad sa putos sa Rebisco crackers. Sa letrato nga gipagawas sa Armed Forces of the Philippines (AFP) sa mga pagkaon nga naabtan sa mga tripulante sa BRP Sierra Madre human gitam-ok sa dagat sa mga sakop sa China Coast Guard.
Gawas sa kasuko sa kabastos ug kaluog sa mga sundawo sa China, nga hasta ang pagkaon sa atong kasundalohan ilang gipareglahan, nisamot ang akong simpatiya sa mga biktima. Kay, bisan sa kalayo sa among bukid sa Casili gikan sa tayaon nilang barko sa Ayungin, pareha ang among pagkaon.
* * *
Nisuway ko sa ubang crackers kay nisurender na sa Skyflakes. Ambot kon mao ba say kasinatian sa taga Ayungin. O wa lang silay kapilian. Nag-agad unsay ihagbong sa ayroplano o unsay di mailog sa China.
Unang alternatibo nga akong natilawan mao ang Magic Flakes Premium Crackers. Samtang mas daghan og sud sa putos (apat dapat), mas lami ug mas kagumkom gihapon ang presko nga Skyflakes. Pasayloa, pero akong masulti human sa daghang nakaon nga ang Magic Flakes bukagay (mas daling madugmok) nga bersiyon. Ug biya sa timpla.
* * *
Mas masaaron ang Rebisco Crackers. Nga aksidente rang natilawan pagbalik human nipalit sa gikamingawan nga dakong lata sa ilang assorted biscuits. Makaambas ang timpa ug di kabentahaan ang kagumkom.
Pero pangitaon kaayo. Nalubong sa ubang tam-is nga biscuits. Nga bisan wa ko ganahi gihurot gihapon aron makuot ang daginuton nga mga piraso sa crackers. Tungod sa letrato sa AFP, akong nahibaw-an nga dunay gagmayng putos sama sa Skyflakes. Maoy sunod nakong suwayan.
* * *
Mag-order na unta online dihang nakabasa sa bag-ong kasayuran sa Philippine Coast Guard (PCG) nga, pila ka adlaw sa wa pa iloga ang gi-airdrop nga mga pagkaon, gibanggaan sa barko sa China ang bangka nga nagdala sa masakitong tripulante sa BRP Sierra Madre nga kinahanglang ipa-ospital sa Palawan.
Akong pagpangita sa kinalamian nga crackers wa ra sa kumingking sa kaseryuso sa pag-ilog sa China sa West Philippine Sea. Pero, samtang nagsuwat ini, dunay nisugyot nga human nipalit sa dakong lata sa Rebisco suwayan na lang sab ang delata nga Skyflakes. Kay iyang nahibaw-an nga, kay mas lig-on ang sudlanan, way hungaw.
* * *
- Latest
