Dear Atty. Divine,
Ang akong papa nasakit ug nagkinahanglan mi og kwarta alang sa iyang operasyon. Tungod niini, nakadesisyon mi nga ang among umahan among iprenda sa among silingan nga usa ka langyaw. Pinay ang asawa niini ug iyang gihangyo ang iyang bana nga mopautang kanamo og himoong collateral ang among yuta. Misugot ang langyaw basta daw magpirmahanay mi og Real Estate Mortgage. Ang akong pangutana kun mamahimo nga makapirma sa Real Estate Mortgage or REM ang langyaw nga dili man siya allowed nga makapanag-iya og yuta sa atong nasud? Daghang Salamat. —Lucena
Dear Lucena,
Ang usa ka langyaw o foreigner mamahimong mortgagee o kabahin sa usa ka real estate mortgagee kun REM. Way balaod nga nagdili kaniya nga mamahimong mortgagee sa usa ka real property nga nahimutang sa Pilipinas. Tinuod nga gidid-an sa atong batakang balaod ang langyaw nga makapanag-iya og yuta sa Pilipinas, apan ang Real Estate Mortgage dili man na moresulta nga iyang mapanag-iya ang property kay gihimo ra man na nga collateral ang property. Gani kun dili ka makabayad sa utang, dili mamahimo nga i-take-over sa foreigner ang property kay gidili kana sa balaod. Ang iyang buhaton mao lang ang pagforeclosed sa inyong yuta. Kon ipublic auction na ang property, dili sab mamahimong moapil sa bidding ang foreigner. Ang halin sa yuta nga iyang i-foreclose maoy iyang madawat isip bayad sa inyong gihuwam ngadto kaniya. Thank you and God bless.
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo