Sa taghoy ni Jinggoy, Bato milikoy

Daghang netizen ang nadismaya sa 4th PDEA Leaks Senate hearing sa miaging Mayo 20, 2024. Kay sa maong adlaw gipakita ni Jinggoy atubangan sa tibuok kalibotan unsa katig-a ang iyang kasingkasing, unsa ka serado iyang utok ug unsa siya kagamhanan? Diin, sa pagwarawara lamang niya sa Personal Data Sheet (PDS) ni kanhi PDEA Agent Jonathan Morales dungan ang pag-ingon nga bakakon o namakak ang ahente tungod sa usab-usab niinig tinubagan, iya dayon kining gipa-cite in contempt.

Apan yuna, unsa ba kining PDS nga maoy gihimong hait hinigiban ni Jinggoy aron mapriso sa Senado si Sir Jonathan? Ang maong mga papel xerox copy lamang. Ang original copy niini nasumiter niya sa PDEA dugay na kaayo. Sanglit, mao man kini usa sa mga gibasehan alang sa makuting paghimog personal background check sa iyang pagkatawo niadtong pag-aplay niyag PDEA agent.

Sa naasoy’ng PDS, tanang ngitngit nga habig labi na bahin sa mga criminal records, seryoso gyong gisusi sa PDEA Recruiting Office. Ug dili ka gayod dawaton ingkasog nakonbikto ka. Unya, ilaha mang gidawat si Sir Jonathan?  Sa ato pa, proven clean ang iyang record. Sa laktod, irrelevant na kaayo ang paghingalan-husga ni Jinggoy kang Sir Jonathan og bakakon.

Mao nga gipangitaan ni Sir Jonathan ang mga nanambong nga PDEA sa original copy. Nga kadali rang gitubag ni PDEA Director General Lazo og: “Your honor, I am not Jonathan Morales. We, PDEA, is not Jonathan Morales.”

Rasong nakapahimuot ug sa hilom nakapataghoy sa dughan ni Jinggoy. Dihadiha, iyang gipa-cite in contempt si Sir Jonathan. Diin sa mao niyang pagpanaghoy-hangyo, ang Bato nga si Senador Ronald dela Rosa, kinsa maoy nahabiling pag-asa sa katawhan ug gituohang sama kalig-on sa puthaw ang baroganan, namugnaw.

Pastilan, inay iyang pahinumdoman si Jinggoy nga ang tumong sa ilang hearing mao ang PDEA Pre-Operations Report, nga gikompirmar na niyang authentic and existing sa unang hearing, ug dili ang hokus-pokus nga pagpangitag sayop sa PDS ni Sir Jonathan, gipaundayonan hinuon ni Bato ang motion ni Jinggoy sa pag-cite in contempt sa ahente.

Diin, pagdukdok niya sa approving gavel, nabasag sab ang iyang political career.  Kay sa taghoy lang ni Jinggoy, ang Bato milikoy!