Inday, aynag sakay sa pasakay

Ang tanghaga likod sa makanunayong pagkusmod sa nawong ni First Lady Liza Araneta Marcos sa higayong makit-an niya si Bise-Presidente Sara ‘Inday’ Z. Duterte-Carpio, natubag-bulgar pinaagi sa usa ka excluxive interview nga gipahigayon ni Antonio ‘Ka Tunying’ Talens Taberna Jr, kanhi sikat reporter-tv host sa ABS-CBN.

Matud pa ni Liza, ang pagtambong ni Inday niadtong first Davao City Hakbang ng Maisug Candle Light Prayer Rally, diin dihang gianunsiyo ni kanhi Presidente Rodrigo Roa Duterte (PRRD) sa iyang pagdiskurso nga si karon Presidente Bongbong Marcos Jr. (PBBM), usa ka ‘bangag’ nga pangulo, labihang pangatawa sa bagang duot sa katawhan ug nahiapil sab si Inday sa paghikatawa, mao diay hinungdan sa kasukong gihambin sa Unang Ginang.

Pastilan, gusto man diay si Liza nga daygon ilang Unang Pamilya, unya nganong gipasakitan man nila pag-ayo ang milyonmilyong botante, kinsa maoy nakapabalik nilang mga Marcos sa Malakanyang?

Human silang mga botante pasaligi ni Bongbong nga ipadayon ang epektibong drugs on war ni PRRD, puohon ang illegal drugs syndicates, terrorists, smugglers, hoarders, corrupt government officials ug uban pang matang sa mga pasawayng mangangalagad, hingpit ba kining natuman dihang siya nay na-Presidente sa Pilipinas? Wala!

Unya, nganong masuko man si Liza, kon paninglon sila sa katawhan? Nganong ipatuok man nila ang freedom of speech, of press and of expression?

Sa panagbangi nila ni Liza ug Inday, may kaisog gihapon si PBBM pagpasabot sa publiko nga dili kini makaapekto sa maayong relasiyon sa Presidente ug Bise-Presidente.

Gani, iya mang gipatuo ang katawhan, nga bisan sa dakong tinguha ni Liza nga ipatangtang si Inday sa pagka-DepEd secretary aron pulihan ni Leni Robredo, dili kini mahitabo kay andam man kunohay si PBBM nga mopugong.

Daghan ang mitambag ni Inday nga dili na magpadala niining mga bolatik ni PBBM. Sanglit pagpakaaron-ingnon lamang kini nga gidapigan niya si Inday. Pero sa tago, padayon siya ug si Liza sa paggamit sa ilang mga hiniktang itoy o alipores aron ipapaghot-ipagukod-ipapahit si Inday hangtod  hingpit kining matangtang sa iyang posisyon. Dili ba, naanad na man si PBBM sa pagpamakak?

Busa, Inday, nga mao na lamay last-card (paglaom) sa katawhang nag-antos, intawon, ayaw nagsakay sa maong pasakay.