Ang Gubat ug Kita

Dili na gyud mabangbang ang mga panghitabo karong mga panahona. Padayon ang gubat tali sa Israel ug Iran.

Daghang danyos sa mga kabtangan ingon man pila na kaha ka mga kinabuhi ang nakalas gumikan ning maong panaggubat.

Kining maong panaggubat bisan asa ug diin nisalamin lamang kun unsay tinud-anay nga panghitabo sulod mismo sa matag kasingkasing sa matag tawo.

Samtang wala pay nakontento sa kinabuhi padayon gihapon kitang manlimbasog sa pakigbisog aron magmadaugon sa gubat nga atong gihimo  o dili ba kaha gipahamtang ngari kanato.

Bisan gani mismo sa hawanang Sagrado anaa man gihapon ang panagbingkil gumikan sa ideolohiya ug baruganan.

Mao nga padayon gihapon ang gubat ug nahimong idlas ang kalinaw ug ang malinawong pagkinabuhi. Samtang padayon kitang nakigbisog ug nakiggubat sa uban, padayon usab nga nagun-ob dili lang ang kalikupan kondili usab ang atong kaugalingong kinabuhi ug ang kinabuhi sa kinabag-an.

Lisud ang panahon karon kinahanglang magmapadayonon kitang magbudlay alang sa kalinaw. Dili alang kanato kondili alang usab sa umaabot nga kaliwatan.

Ang maong kalinaw makab-ot lamang kun maantigo kitang moabli sa atong kaugalingon alang sa kalinaw. Matud pa sa awit: “Let there be peace on Earth and let it begin with me!”