Sala sa magtutudlo, ang estudyante ang gihasol

Nay nagpadala og mensahe nga ginikanan sa usa ka tinun-an sa senior high school sa pribadong tunghaan dinhi sa Sugbo kalabot gihulagway niini nga power tripping sa magtutudlo. Arong mapirmahan ang iyang clearance sa subject gikinahanglan nga masumiter sa tinun-an ang project niini kay mao man lagi ang requirement.

Gipaningamotan sa estudyanteang pag research, nagbilar ug nag gasto pa gyud alang sa pagpa computer aron lagi madako dako pud ang grado ug mapirmahan usab ang clearance.

Na-submit niya sa wala pa ang deadline, apan nahibulong ang estudyante kay giingnan man siya sa teacher nga nawala ang ang project niini ug pahimoon siya og balik sa project aron mapirmahan ang clearance. Hilabihan intawon ka hugno ang estudyante kay nahulong sa wala ang iyang gihagoan, gibiliran kay giwagtang man sa ilang maestra ang project.

Angayan ba ang estudyante pahimoon og balik sa project nga ang maestra man ang nakawala niini, ambot asa niya nabutang, ka dakong inhustisya ani sa estudyante nga sa dakong kasayon ingnon ra siya nga nawala ang project ug siya pa ang kapoy kapoyon sa paghimo og usab.

Klaron kaayo nga ang magtutudlo ang nakasala kay tungod sa iyang kadanghag nawagtang ang project, ni pagpangayo og sorry ngadto sa tinun-an wala niya himoa. Sa ingon niini nga panghitabo unsa man ang angyan nga himoon sa tinun-an? Kong ako dili na ko mohimo og usab inay ang maestra ang mohimo og pamaagi nga masulbad sa problema kay siya man ang nakawagtang aw siya ang mohimo sa project. Gihagoan intawon ug gigastohan, dili lalim labi na og daginoton ang budget.

Kong pahimoan man og usab, at least motanyag ang magtutudlo nga moay mogasto sa pagpahimo, pero dako gyud nga kahasol ang gimugna ani busa dili na angayan nga magpa-stress ang tinun-an, ang iyang maestra nga nakasala maoy mohimo sa project.

Dako kaayo ang pagrespeto sa mga tinun-an sa ilang magtutudlo busa careful usab sila sa pag-handle sa mga panghitabo.

Kong sila ang makasala ilang angkonon ug mangayo og pasaylo, kay kong palabyon kini, sundogon usab sa mga tinon-an nga ok ra diay makawagtang og butang sa ubang tawo kay wala may tulobago nga atubangan pareha ni maestra ug maestro.

Molabtik kita sa mga tinun-an nga tapolan ug badlogon nga naghatag og konsumisyon sa mga magtutudlo. Apan ato pud labtikan si ma’am kon dunay sipyat nga mahimo ilabi na kong murag wala man lay remorse pagmahay sa gihimo niini.

Kong unsa ka dako ang respeto sa mga tinun-an kang mam ingon usab niini unta ang ibawos sa nila ngadto sa mga tinun-an kay sila ang gihimong sumbanan ilang mga estudyante.