Dear Atty. Divine,
Usa ko ka OFW ug aduna koy napalit nga yuta pinaagi sa data-data. Sa dihang na fully paid kini, ang akong igsuon ang akong gisugo sa pag-process sa papers aron ma-transfer ang titulo ngadto sa akong pangan. Sa dihang miuli ko, gihatag na sa akong igsuon ang akong titulo sa yuta apan nakurat ko kay naapil man sab ang iyang pangan sa titulo isip co-owner. Ako siyang gipangutana kun nganong naapil ang iyang pangan sa title miingon siya nga tungod daw kay siyay nag-process. Apan sa dihang nakita nako ang Deed of Absolute Sale, naapil sab gyud ang pangan sa akong igsuon isip buyer, so nahulog nga kaming duha ang mipalit sa yuta hinungdan nga naapil siya as co-owner sa titulo niini. Wa man siya mo contribute sa pagpalit sa maong property. Unsay akong buhaton aron pagtangtang sa pangan sa akong igsuon sa akong titulo sa yuta? Daghang salamat. -- Nerisa
* * *
Dear Nerisa,
Kay ang imong igsuon nahulog man nga co-owner sa maong property, matangtang lang ang iyang pangan niini kun mo execute siya og Deed of Donation in your favor. Kining maong dokumento, inyo unyang i-submit sa BIR aron bayran ang Donor’s tax. Once mabayran na ninyo ang Donor’s tax ug anaa ka nay Certificate Authorizing Registration mao kini inyong i-submit sa Registry of Deeds aron isyuhan ka og laing titulo nga wala na ang name sa imong igsuon. Ang titulo dili kini basta-basta nga mausab kun adunay mga sayop. Kinahanglan nga moagi ka og proseso. Ang uban ganing sayup moagi pa sa korte aron lang mausab ang entry niini. Kun ang imong igsuon naka SPA ra , dapat wa niya giapil ang iyang name sa Deed of Sale apan kay nahuman na man ang tanan, then mogasto na sab mo aron matangtang ang iyang name sa titulo. Thank you and God bless. -- Atty. Divine
* * *
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.