Unang Pulong

Nagakapupos na mga nahabiling adlaw sa Kuwaresma. Moabot na ang unang adlaw sa Semana Santa nga mao ang pagbendeta sa mga Lukay.

Mga bililhong adlaw sa pagpuasa, sa pagsakripisyo, sa pagpangayog pasaylo ug sa pagpinasayloay sa atong mga sala aron kita makaambit sa kaluwasan nga gitanyag sa atong Ginoong Hesukristo diha sa Iyang pagpas-an ug pagpakamatay sa krus, timaan sa Iyang dakong gugma ug kaluoy natong makasasala. Unta, dili usikan!

Pagkamatay niadtong mapahitas-ong dato, kinsa sa buhi pa naghinobra ka dawo, wala gyod makahatag og pagkaon niadtong masakitong pobreng gigutom, kondili gipatilapan ra ang nuka niini sa iyang mga iro, nakurat na lang! Kay impiyerno man iyang napuntariyahan.

Samtang pagkamatay niadtong mapaubsanong kabos, nasina siya kay malipayon man kaayo kining nakig-uban ni Abraham didto sa langit.

Mihangyo ang dato ngadto ni Abraham. Kon mahimo, hatagan siyag laing chance pagbalik sa kalibotan aron masultian iyang mga igsuong hakog usab, bahin sa unsay iyang gidangatan?

Buwahan, sila magbag-o na ug dili mahipunta ning iyang espidnong nahimutangan.

Maong giingnan ang dato ni Abraham, nga igo na si Moises, ang mga propeta ug mga tinun-an (apostoles-disipulos, kaparian) o mga piniling magsasangyaw sa mga Pulong sa Ginoo.

Kay kutob sa kinsay motuo-motuman niini, maluwas gayod ug makaangkon sa kinabuhing dayon.

Apan makapahasubo ang mga nagkadaiyang panghitabo nga masaksihan nato sa atong palibot karon.

Kasagarang public servants gikan sa barangay ngadto sa Malakanyang, inay magkahiusa sa pagtukod og mauswagong Pilipinas subay sa kabubut-on sa Diyos, nagkinontrahay hinuon.

Tan-awa ra god unsay gibuhat sa atong Kongreso ug Senado ngadto sa atong Bise Presidente Sara ‘Inday’ Duterte?  Inay ilang tahuron sama sa ilang pagtahod kang Presidente Bongbong Marcos, ila hinuog gitabangag duot-pakaulaw-saway!

Ngano man? Nagtuo kaha sila nga kon unsay gitagoan nilang daotang laraw, wala kini makita sa atong Manunubos nga gilansang sa mga Hudeyo sa krus?  Nakita, uy!

Ugaling lang, kay sobra ka dako ang Iyang gugma ug kaluoy natong nangahisalaag. Ug gusto Niyang luwason ang tanan.

Busa, sa hataas nga tingog, Iyang gipalanog ang una sa Kataposang Pito Niya Ka Pulong, ayawat madunggan sa mga Kongresista ug Senadores: “Amahan Ko, pasayloa sila kay wala masayod sa ilang gibuhat!”

Unta, matandog-dutlan sila!