Wa mabayri ang iyang credit card

Dear Atty. Divine,

Ang akong igsuon nakadawat og demand letter gikan sa usa ka abogado may labot sa iyang utang sa credit card. Wala niya kini mabayri attorney kay nasakit man gud ang iyang mother in law og dako sila og nabayran sa hospital. Basi sa iyang nadawat nga demand letter, pasakaan siya og kasong criminal kon mapakyas siya sa pagbayad niini. Ang iyang pangutana, mamahimo ba nga mapasakaan siya og kasong criminal kun  mapakyas siya sa pagbayad sa maong utang sa credit card? Daghang salamat. -- Roxan

* * *

Dear Roxan,

Basi sa Article 3 sa atong Constitution kini nagkanayon nga “No person shall be imprisoned for debt or non-payment of a poll tax”. Buot ipasabot nga ang mga giutangan dili mamahimong mopapriso sa nangutang tungod lang sa kapakyas sa pagbayad niini. Gawas lang kon ikaw nakahimo og laing krimen sama sa pag-issue og cheke sa imong giutangan og miuntol ang maong cheke kay way pundo, mamahimo kang pasakaan og kasong criminal nga kalapasan sa Bouncing Checks law or BP 22. Apan kini dili tungod sa imong kapakyas sa pagbayad sa utang kondili gumikan sa imong pag-issue og cheke nga way pundo. Laing kalapasan sab nga mamahimo kang mapasakaan og kaso mao ang Republic Act No. 8484 sama niining paggamit nimo og credit card unya imo gyung gituyo sa paghurot ang pundo niini ug wa kay intention nga mobayad og misibat ka sa inyong lugar human sa imong pagpahimus, kini nga sitwasyon mamahimo sab ikaw nga mapasakaan og kaso.  Apan sa kaso sa imong igsuon, kun wa siyay intention nga mosibat sa iyang bayrunon sa credit card ug wa sab siyay planong mosibat sa iyang pinuy-anan  then wa siyay nahimong kalapasan sa balaod. Ang maayo niyang buhaton mao ang  pagbayad sa hinay-hinay sa iyang utang sa credit card. Thank you and God bless. -- Atty. Divine

Alang sa inyong pangutana, palihug lang sa pag-email sa [email protected] og akong tubagon ang inyong pangutana pinaagi sa akong column matag  Miyerkules, Sabado og Domingo.