Ipahunong ug ipasira ang tanang nakagusbat sa Chocolate Hills

Hilabihan ka init ang isyu karon sa usa ka resort nga gimugna sa tiilan sa chocolate Hills sa lungsod sa Sagbayan sa lalawigan sa Bohol human nakuhaan og video via drone ang dapit nga nag-viral karon sa social media nga gisakyan sa mga tawo ug karon sa mga politiko apil na gani ang senado.

Pulos tanan nipadayag sa ilang kadismaya ug kahinugon kuno kay naguba na kuno ang kalikopan tungod sa pagpanamastamas sa dapit.

Pastilan intawon mogawas gyud ang pagka-concern kunohay sa mga tawo, apan sa tinuod lang unsa man pud ang ilang nahimo? Karon nga nag-viral mosakay usab sa kasikat sa isyu.

Dili sa pagdapig sa tag-iya ining Captain's Peak Garden Resort, wala man intawon kini nakagusbat sa chocolate hills kay naa ra man sa tiilan sa buntod ang pasilidad nga ilang gitukod.

Gani nindot ra man tan-awon sa mata kay gipahaum man nila sa palibot.  Kong itandi nato sa naunang mga tourist attraction sama nalang sa lungsod sa Carmen nga gibutangan og hagdan, gipatag pa gyud ang ibabaw sa chocolate hills, naa bay nagpakabana ani kaniadto ug karon?

Kong kadaut lang sa kinaiyahan klaro pa sa pahak ang kadaut niini kay gigusbat gyud ang buntod kay gibutangan og viewing deck.

Kong tinuod man ang pagpakabana niining mga environmentalist kuno, apilon tanan nga development diha sa Chocolate Hills ang ipahunong ug pasirad-an aron patas kay apil man tanang buntod sa tulo ka lungsod nga gidelarar nga UNESCO Heritage  Geopark.

Ang nakalisod sa kinaiya sa mga tawo ilabi na sa mga politiko mao nga ayha ra mosakay sa isyu kong mag-viral na kini aron madala sa kahig kusog mo grandstanding ba.

Kong wala pa hatagi og titulo sa gobiyerno, duna pay resolution sa Protected Area Management Board ug duna pay approval mismo sa DENR ang gihimo sa tag-iya nga development, dili unta niya kini   buhaton.

Unta dili lang kutob sa resort ang pagtagad kon dili alang sa tanan nga nakamugna og kadaut sa katahum sa natural monument sa Bohol ang ilang tutokan aron mapanalipdan ang kalikopan.