Abi nako og sa probinsiya ra kini uso ang sugilanon sa dili ingon nato o kining gitawag nga mga engkanto o elemento apan anaa pa diay gihapon kini sa usa ka malamboon nga dakbayan sama sa Cebu City. Nag-viral sa social media ang gihimong pagsaba saba sa mga tawo sa usa ka sitio sa Barangay Inayawan human nagtuo sila nga gitagoan kuno sa usa ka agta ang 6-anyos nga bata.
Susama gyud sa pelikula ang gihimo sa mga tawo nga nagtambol sa takob sa kaldero nagbunal sa sin ug nagsinggit atubangan sa dakong kahoy nga gituohan nila nga pinuy-anan sa usa ka elemental o agta diin matud pa maoy nitago sa bata. Nigamit pa gyud sila og mga insenso hangtud nga nilugwa ang bata sa ilawom sa sakyanan nga giparking haduol sa kahoy.
Ang 6-anyos nga bata consistent sa iyang pamahayag nga gikuha siya sa usa ka dakong tawo diin matud niya nga bisan unsaon niya og hilak dili man makadungog ang mga tawo nga nagpangita kaniya apan diya makadungog sa gihimo sa mga tawo nga anaa sa iyang palibot.
Mao kini ang nakaingon sa pagtuo sa mga tawo didto nga usa gyud ka agta ang nagtago sa bata. Busa bisan pa man sa nadawat nila nga pagbiaybiay sa social media nga wala motuo sa ilang estorya wala kini makaapekto kanila kay alang sa mga tawo sila man ang nakasaksi ug nakasinati sa maong insidente.
Alang sa mga judgmental basin og napasmohan ra kuno ang mga tawo didtong dapita maong bisan unsa nalang ang nakita ug giapil-apil pa ang agta. Sakit baya pud alang sa mga hingtungdan nga ipakaubos kay lagi nahisakop sila sa kabus nga komunidad.
Matinuod man o dili ang gitug-an sa bata, angayan baya usab kini hatagan og pagtagad. Ibutang nato kong tinuod nga dunay paranormal nga panghitabo kinahanglan nga adunay intervention ang simbahan o ang mga eksperto sa pagpapahawa sa dautang espirito kon aduna man gyud.
Posibleng aduna usay problema sa panglawas ang bata nganong nahimo niya kini kay posible usab nga nitago lang siya ug naghimo himo og estorya. Busa mas maayong ipahiling ang iyang kondisyon aron mahatagan usab og intenvention samtang sayo pa.
Labaw sa tanan, basin kon aduna gyuy tawo nga dunay dautang tuyo sa bata simbako gustong moamong-among kaniya. Angayan kining imbistigahan aron mapanalipdan ang bata kay sa panahon karon mas delikado pa kining mga tawhana kay sa agta ilabi na kon makagamit og illegal nga drugas nga segurado gyud nga mohimo og dautan ngadto sa ilang isig ka tawo.
Maayo nalang kay nadala og sabasaba sa mga tawo ug gibuhian ang bata gikan sa kamot sa dautang tawo, tawo ha dili agta, lisod na kaayo ang panahon karon kay bisan kadugo gani dili na gyud kakompiyansahan.