Ang Sugbo

Happy 67th Charter Day to Cebu City!

Gilingi nako ang kasaysayan sa Dakbayan sa Sugbo sa wa pa kini mahimong siyudad kaniadtong 1937.

Nindot ang baybayon dinhi sa Sugbo kaniadto kay kanang likud nga bahin sa nahimutangan karon sa City Hall, baybayon pa kana ug may hulagway ko sa wa pa gani matukod ang Gotiaoco building.

Tiaw mo, matud pa sa kasugiran nga ang Gotiaoco building usa sa mga karaan nga building ug maoy labing una nga dunay elevator dinhi sa Sugbo kaniadto?

Ang hulagway nga nahuptan nako wa pa ang Gotiaoco building nga natukod kaniadtong 1914. Ang hulagway sa munisipyo sa Sugbo kaniadto gamay pa kaayo.

Sagdi lang, sa usa sa atong mga lindog sa umaabot nga mga adlaw, hisgotan nato kining mga panghitabo sa karaang panahon dinhi sa Sugbo.

* * *

Kaniadtong Martes, ang mga motorista nga miagi sa South Coastal Road diha sa viaduct, nakasinati og grabeng problema sa traffic kay dunay naabereya nga truck.

Naputos sa pagsaway ang nagdumala sa Cebu City Transportation Office nga si Raquel Arce, apil na gani si Mayor Michael Rama, kay nanga-late ang mga motorista pag-abot sa ilang mga destinasyon tungod sa grabeng traffic.

Tinuod, kadlawon pa naabereya ang truck ug wa kini makuha hangtud sa mga alas utso sa buntag. Diha nga nangasuko ang mga tawo.

Ang makina sa truck nakasinati og engine trouble, napawong ug dili na gayud moandar. Matud ni Raquel Arce, ang mao diay nga truck, may mechanism nga kon mapawong ang makina niini, automatic nga mo-lock ang ligid ug bisan kon guroyon nimo, dili motuyok.

Ang tag-iya sa truck natagbaw pagpangita og “special mechanic” nga makatangtang sa lock, aron nga bisan og dili pa moandar ang makina, maguroy ang truck.

Buntag na sila nakakita og “special mechanic” ug mao na ang rason nga dugay’ng nakuha ang sakyanan.

Dili tinuod ang giingon sa mga balhibuon og dila nga gituyo kuno pagdugay-dugay pagkuha ang truck aron kada oras makakolekta og P1,000 nga multa ang CCTO.

May mga tawo man gud nga pwerteng makabuhat og estorya, nga mora’g sila na lang gyud ang makamao, ug kay nasakripisyo sila sa traffic mangita gyud sila og bisan unsa na lay ikasulti aron pagdaot sa kagamhanan.

Pero sigurado ko nga kon gamiton nila ang tukma nila nga panghunahuna, ang rason nga grabe ang problema karon sa traffic kay daghan na ang mga sakyanan.

Kining mga nanaway, kaniadto wa gyud ni sila’y mga sakyanan, ug apil kita nga nakadugang sa kahuot sa karsada kay kita namalit man og sakyanan.

Ang national government, pinaagi sa DPWH, pakyas sa pagpalapad sa atong mga karsada mao nga naghuot ang mga sakyanan. Mao gyud na ang rason.