Lawasnong pagpitol

Matag sulod nato sa Kwaresma mosantop gyud nato ang mga isyu kalabot sa lawasnong pagpitol diha sa konteksto sa abstinensiya ingon man sa pagpuasa. Ang abstinensiya dili kita mokaon og karne sa matag adlaw nga biyernes sulod sa kwaresma.

Niadtong seminarista pa mi matag Biyernes tibuok tuig sayud gyud mi nga monggos ug sinugbang isda ra gyud among kaunon. Ang puasa sa laing bahin mao kadtong paglikay sa pagkaon sama pananglit sa paniudto o panihapon segun sa mahimo o makaya.

Mahimong gihimo nato kini alang sa medical nga tumong sama sa mga gi-required fasting sa dili pa ang mga laboratory tests.

O tungod sa kamandoan sa usa ka rehiliyoso ug espirituhanong kawsa. Kasagaan ang tumong niini mao ang paghingpit sa kaugalingon alang sa mas hataas nga tumong ug katuyoan. Mahimong kining mga katuyoan naglangkob ning mosunod:

1. Pagpangayo nga mapasaylo ang atong mga sala.

2. Aduna kitay seryoso nga gipangayo sa Dios.

3. Agig pagpangandandam alang sa linain nga misyon sama sa gihimo ni Jesus sulod sa kap-atan ka adlaw ug gabii didto sa kamingawan.

Daghan ang niingon nga mahimo og bisan unsay atong makaon basta ang mahinungdanon mao nga nakahimo kita og mga buhat sa kaluoy ngadto sa atong isig ka ingon, gihatag nato ang paghigugma ug gigamit nato ang atong dila sa pagpanalangin ug dili ang pagtunglo.

Husto man tuod kini apan ang walay igong pagbansay sa disiplina nga lawasnon mamahimong makapakawang ning maong kabag-ohan nga halayo sa tradisyon.

Mahimong ang tradisyon hatagan og hustong pagsabot ug pagbansay apan wala kini magpasabot hulipan kini sa binag-o nga mopakagamay sa tradisyon sa Mortification. Hinumdomi dili tanang lami nagdala og kinabuhi. Dunay mga lam inga nagdala og kamatayon.

Esmiringhoy ra kaayo ang mga tawo nga motuo sa mga matam-is nga pulong gikan sa dila ug pagtulon-an nga makahilo. Imbis kahiusahan ang gidala, nagdugang naman hinuon sa kagubot ug kalibog!