Dear Atty. Divine,
Ang akong amiga mikuha nako og mga alahas aron iyang ibaligya. Ang among sabot 15% iyang commission sa matag alahas nga iyang mahalin. Ang among sabot nga kun di mahalin ang alahas nga iyang gikuha sud usa ka buwan iya kining ibalik nako. Sa una namong transaction, nahurot og kahalin ang iyang gikuha nga mga alahas ug ako siyang gihatagan og commission. Apan sa ikaduha namo nga transaction wa na man siya motuman sa among sabot, wa niya i-remit ang halin ug wa sab niya iuli ang mga alahas. Ako na siyang gipadad-an og demand letter kay dako ang kantidad sa mga alahas nga iyang gikuha apan wa man siya motubag. Di sab siya mo reply sa akong mga text og tawag. Unsa may angayan nako nga buhaton? Daghang salamat. -- Gwen
Dear Gwen,
Mamahimo kang mopasaka og reklamo batok sa imong amiga ngadto sa barangay diin siya nagpuyo aron kamo magka-atubang ug maareglo. Apan kun di siya moatubang kanimo sa barangay then imo nalang gyud siya nga pasakaan og kasong Estafa. Basi sa Article 315 (1) (b) sa atong Revised Penal Code mamahimo nga pasakaan og kasong Estafa ang si bisan kinsa nga mo “misappropriate” or mo “convert” sa kwarta o sa goods og uban pang personal property nga anaa kaniya. Ang kapakyas sa imong amiga pag-remit sa halin o pag-uli sa mga alahas makonsiderar nga kalapasan sa maong balaod ug mamahimo nimo siyang pasakaan og kasong criminal tungod sa iyang gibuhat. Sa kasong Estafa kinahanglan nga imong pamatud-an sa korte kining mosunod: 1) Nga iyang nadawat ang mga alahas nga dapat unta niya ibaligya 2) Wa niya gi-remit ang halin or wa niya giuli ang mga alahas 3. Tungod sa iyang gibuhat na-alkanse ka or ikaw na hinuon ang nakabayad sa maong mga alahas sa imong supplier 4. Imo na siyang gipadad-an og demand letter aron i-remit ang halin or iuli ang mga alahas nga iyang gikuha apan wa kini niya buhata. Kon imo kining mapamatud-an hayan makombikto gyud ang imong amiga sa maong kaso. Apan mas maayo nga imo una siyang hatagan og higayon pag-settle sa iyang obligasyon kanimo sa dili ka pa modangop sa korte. Thank you and God Bless. -- Atty. Divine
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.